حالىق قالاۋلىسى بولۋعا نيەتتىلەر توتىداي تارانىپ، سۇڭقارداي سىلانىپ سايلاۋ الدى 

ناۋقانعا بىلەك سىبانا كىرىسىپ كەتكەن سىڭايلى. اسىلى ، حالىق قالاۋى ما ، جوق باسقانىڭ تاڭداۋى ما، ونى وزدەرىنىڭ ارلارىنا سالايىق. 

سايلاۋ بولعاسىن بارلىعى زاڭ اياسىندا شىنىداي تازا ، مۇلتىكسىز ورىندالۋى مىندەت. 

ءبىراق جەزقازعان قالالىق سايلاۋ وكرۋگىنىڭ اينالاسىندا وتە كۇماندى ماسەلە ءجۇرىپ جاتقان سەكىلدى. 
جەزقازعان قالاسى بويىنشا جالپى سانى 13 - سايلاۋ وكرۋگىنىڭ ءارقايسىسىندا نەبارى ەكى كانديداتتان تىركەلگەن. كەيبىر وكرۋگتەردە ءبىر مەكەمەنىڭ باسشىسى ءوزىنىڭ قولاستى قىزمەتكەرىمەن دوداعا تۇسسە،  باسقاسىندا بلوگەر مەن ونىڭ موبيلوگرافى ءبىر وكرۋگتە بولۋى تاڭ قالدىرادى ؟   بۇل باسەكەلەستىكتىڭ قانشالىقتى دەڭگەيدە ەكەنىن كورسەتىپ تۇر. 
اسا نازار اۋداراتىن جايت،   اكىمشىلىك سايتىندا باستاپقىدا  اتالعان  كانديداتتاردىڭ رەسمي جۇمىس ورىندارى كورسەتىلسە، اراعا كۇن سالماي  اياق استىنان "جۇمىسسىز" بولىپ وزگەرتىلە سالعان. بۇل سوندا كانديداتتار قىزمەتتەس ەمەس دەپ حالىقتى جاڭىلىستىرۋ ما؟ ءوز كەزەگىندە بۇل دەرەكتەر   باسقا اقپارات كوزدەرىمەن سايكەس كەلمەۋىنە بايلانىستى،  جەكە مالىمەتتەردى بۇرمالاۋ ورىن الىپ وتىر دەپ ەسەپتەيمىز. ساياسي سالماعى بار ماسەلەگە  اتالمىش كانديداتتاردىڭ وزدەرى نە ايتارى بار؟  ورتالىق سايلاۋ كوميسسياسى نازارىنا، اتالعان رەسمي اقپارات سايلاۋشىلار تاڭداۋىنا ىقپال ەتۋى سەبەپتى،   سايلاۋ  ناتيجەسىن زاڭسىز دەپ تانۋعا نەگىز بولۋى مۇمكىن عوي؟ 
 وسى ورايدا  حالىقتىڭ سەنىمىنە يە بولعان، ەلگە ادال قىزمەت ەتۋدى ماقسات تۇتقان ازاماتتار قاشان ءماسليحات تورىنەن ورىن الادى دەگەن ساۋال تۋىندايدى. 
«سارىارقا» قوعامدىق بىرلەستىگى مەن تاۋەلسىز كوزقاراستاعى ءبىرقاتار ازاماتتاردىڭ بۇل سايلاۋعا قاتىسۋدان باس تارتۋى بيلىككە وي سالدى ما؟ الدە ەركىن ويدى ودان ءارى تۇنشىقتىرۋ  نەگىزگى ماقسات پا ەدى؟ شىنىندا سۇراق كوپ. 

كەشەگى اقش-تا وتكەن سايلاۋدى كورىپ وتىرىپ، ەرىكسىز قىزىعاسىڭ، ىشتەي سۇيسىنەسىڭ. ساياسي باسەكە، اشىق تارتىس، حالىقتىڭ تاڭداۋى دەگەننىڭ قانداي بولاتىنىن كورەسىن. 

بىزگە دە ءادىل باسەكەگە نەگىزدەلگەن، ناتيجەسىنە ەشكىم كۇمان كەلتىرمەيتىن شىنايى سايلاۋ بۇيىرار ما ەكەن؟ الدە ءادىل سايلاۋ وتكىزۋ قازاق ەلىنىڭ ماڭدايىنا جازىلماعانى ما؟

وسىعان بايلانىستى ەلىمىزدىڭ  ورتالىق سايلاۋ كوميسسياسىنان، باس  پروكۋروردان جەزقازعان قالاسىنداعى بارلىق 13 سايلاۋ وكرۋگىنىڭ  كانديداتتارى مەن ولاردىڭ باسەكەلەستەرى اراسىنداعى ىقتيمال قىزمەتتىك، تۋىستىق، ىسكەرلىك بايلانىستاردى،  كانديداتتاردىڭ  جەكە مالىمەتتەرىنىڭ  شىنايلىعىن، جەكە دەرەكتەردى  جاريالاعان رەسمي اقپارات كوزدەرىن زاڭ اياسىندا جان-جاقتى ءارى شۇعىل تەكسەرۋدى تالاپ ەتەمىز.

تەكسەرىس ناتيجەلەرى ناقتى دەرەكتەر مەن دالەلدەرگە سۇيەنە وتىرىپ، قوعامعا جاريا ەتىلۋى قاجەت.

قۇرمەتپەن: «سارىارقا» قوعامدىق بىرلەستىگى.