فورمۋلا-1 سالاسىندا 23 جىلدان استام تاجىريبەسى بار يسپانيالىق مامان چاۆي پۋجولار الماتى وبلىسىنداعى «سوكول» سپورتتىق-تەحنيكالىق كەشەنىنە كەلدى. ول اۆتودرومنىڭ ينفراقۇرىلىمىمەن تانىسىپ، جوعارى دەڭگەيدەگى حالىقارالىق جارىستاردى، سونىڭ ىشىندە فورمۋلا-1 كەزەڭدەرىن وتكىزۋ مۇمكىندىكتەرىن باعالادى جانە كەشەندى ودان ءارى دامىتۋ بويىنشا ءوز ۇسىنىستارىن ءبىلدىردى.
چاۆي پۋجولار فورمۋلا-1 چەمپيوناتىنداعى Jaguar، Williams، Toro Rosso جانە Sauber سەكىلدى تانىمال كوماندالاردا كوپ جىل ەڭبەك ەتكەن تاجىريبەلى مامان. ول Sauber كومانداسىندا جارىس ديرەكتورى قىزمەتىن اتقارعان. بۇگىندە ونىڭ كاسىبي تاجىريبەسى حالىقارالىق اۆتوسپورتتى دامىتۋعا باعىتتالعان جوبالاردا كەڭىنەن قولدانىلىپ كەلەدى.
«سوكولعا» ساپارى بارىسىندا ساراپشى جارىس تراسساسىنىڭ كونفيگۋراسياسىن، تەحنيكالىق ينفراقۇرىلىمىن جانە قاۋىپسىزدىكتى قامتاماسىز ەتۋ جۇيەسىن جان-جاقتى زەردەلەدى. اسىرەسە اۆتودرومنىڭ حالىقارالىق اۆتوموبيل فەدەراسياسىنىڭ (FIA) قازىرگى تالاپتارىنا سايكەستىگىنە ەرەكشە نازار اۋداردى.
تەكسەرۋ قورىتىندىسى بويىنشا چاۆي پۋجولار كەشەننىڭ ينفراقۇرىلىمىنا وڭ باعا بەردى. ونىڭ پىكىرىنشە، اۆتودروم جالپى العاندا زاماناۋي قاۋىپسىزدىك ستاندارتتارىنا سايكەس كەلەدى، ال جەتىلدىرۋدى قاجەت ەتەتىن تۇستار جەكەلەگەن ماسەلەلەرمەن عانا شەكتەلەدى.
ساراپشىنىڭ ۇسىنىستارى نەگىزىنەن FIA-نىڭ سوڭعى تالاپتارى مەن حالىقارالىق تاجىريبەسىن ەسكەرە وتىرىپ، قاۋىپسىزدىك جۇيەسىنىڭ كەيبىر ەلەمەنتتەرىن جەتىلدىرۋگە قاتىستى بولدى. بۇل رەتتە اۆتودرومنىڭ جالپى تۇجىرىمداماسى مەن ينفراقۇرىلىمىنا قاتىستى ەلەۋلى ەسكەرتۋلەر ايتىلعان جوق.
چاۆي پۋجولار كەشەننىڭ زاماناۋي ەرەكشەلىكتەرىنە دە توقتالدى. «سوكول» الەمدەگى سالىستىرمالى تۇردە جاڭادان سالىنعان حالىقارالىق اۆتودرومداردىڭ ءبىرى بولعاندىقتان، مۇندا جارىستاردى ۇيىمداستىرۋدىڭ وزىق تەحنولوگيالىق شەشىمدەرى مەن زاماناۋي تاسىلدەرىن قولدانۋعا مۇمكىندىك بار.
كەشەننىڭ ۇزىندىعى 4 495 مەتر بولاتىن نەگىزگى جارىس تراسساسىن فورمۋلا-1 اۆتودرومدارىن جوبالاۋعا ماماندانعان الەمگە ايگىلى Tilke Engineers & Architects ساۋلەت بيۋروسى ازىرلەگەن. قازىرگى ۋاقىتتا اۆتودروم FIA Grade 2 حالىقارالىق ساناتىنا يە. ال كەشەندى ودان ءارى دامىتۋ جوسپارى ينفراقۇرىلىمدى بۇدان دا جوعارى دەڭگەيگە دەيىن جاڭعىرتۋ مۇمكىندىگىن قاراستىرادى.
چاۆي پۋجولاردىڭ ساپارى قازاقستاندا ءىرى حالىقارالىق اۆتوسپورت جارىستارىن وتكىزۋ پەرسپەكتيۆالارىن زەردەلەۋ باعىتىنداعى ساراپتامالىق جۇمىستىڭ كەزەكتى كەزەڭى بولدى. فورمۋلا-1 سالاسىندا مول تاجىريبە جيناقتاعان مامانداردى تارتۋ «سوكول» سپورتتىق-تەحنيكالىق كەشەنىنە تاۋەلسىز كاسىبي باعا الۋعا جانە الداعى دامۋ باعىتتارىن ايقىنداۋعا مۇمكىندىك بەرەدى.
ساپار سوڭىندا چاۆي پۋجولار كەشەن ۇجىمىنا الداعى جۇمىستارىنا تابىس تىلەپ، قازاقستاندا اۆتوموبيل جانە موتوسيكل سپورتىن دامىتۋعا باعىتتالعان باستامالارعا قولداۋ ءبىلدىردى.
