بۇگىن، 24 قازان كۇنى ماقسات ءتاج-مۇرات انەسۇلىنا ارناپ جىلدىق اس بەرىلەدى. 

بيىل بەلگىلى جازۋشى، ەسسەيست، فيلولوگيا عىلىمدارىنىڭ كانديداتى، قازاقستان جازۋشىلار وداعىنىڭ مۇشەسى، ۇلاعاتتى ۇستاز ماقسات ءتاج-مۇرات انەس ۇلىنىڭ ومىردەن وتكەنىنە ءبىر جىل تولىپ وتىر. 

ماقسات انەس ۇلى بار عۇمىرىن قازاق ءسوزىنىڭ ءقادىرىن ارتتىرۋعا، ۇلت تاريحىن زەرتتەۋگە، الاش قايراتكەرلەرىنىڭ مۇراسىن زەردەلەۋگە ارنادى. ول ءال-فارابي اتىنداعى قازاق ۇلتتىق ۋنيۆەرسيتەتىندە ۇستازدىق ەتىپ، تالاي جاستىڭ عىلىم مەن جۋرناليستيكاعا بەت بۇرۋىنا جول اشتى. ءبىلىمى مەن تاجىريبەسىن شاكىرتتەرىنە ۇيرەتىپ، ارتىندا ونەگەلى ءىز قالدىردى.

ماقسات ءتاج-مۇرات انەس ۇلى 1959 جىلدىڭ قاراشا ايىندا اتىراۋ وبلىسى جىلوي اۋدانىندا دۇنيەگە كەلگەن. قازمۋ-دىڭ جۋرناليستيكا فاكۋلتەتىن ءتامامداپ، ەڭبەك جولىن جۋرناليستيكا مەن عىلىمعا ارنادى. ءار جىلدارى «انا ءتىلى» ۇلت اپتالىعىنىڭ باس رەداكتورى، رەسپۋبليكالىق باسىلىمداردا جاۋاپتى قىزمەتكەر جانە ءال-فارابي اتىنداعى قازۇۋ-دىڭ دوسەنتى بولىپ ەڭبەك ەتتى.

ول قازاق تاريحى مەن ادەبيەتىن زەرتتەۋگە ەلەۋلى ۇلەس قوستى. «شاڭگەرەي: جاسامپازدىق ءومىرى»، «باتىس الاشوردا: بيبليوگرافيالىق سوزدىك تاجىريبەسى»، «مانشۇكتىڭ ءمالىمسىز مايدانى» اتتى ەڭبەكتەرى مەن جۇزدەن استام عىلىمي جانە پۋبليسيستيكالىق ماقالاسى – قالامگەردىڭ مول مۇراسىنىڭ ءبىر بولىگى.

ماقسات انەس ۇلىنىڭ ۇلت تاريحىنا دەگەن ادالدىعى، عىلىمعا سىڭىرگەن ەڭبەگى مەن ۇستازدىق ونەگەسى ونى بىلەتىن جانداردىڭ جادىندا ساقتالادى. ونىڭ شىعارمالارى مەن شاكىرتتەرىنە قالدىرعان رۋحاني مۇراسى كەيىنگى ۇرپاق ءۇشىن دە قۇندى بولماق.

جىلدىق اسىنا شاقىرۋ

اسىل اكە، ارداقتى جار، قامقور باۋىر، ادال دوس بولعان ءتاج-مۇرات ماقسات انەس ۇلىنىڭ رۋحىنا قۇران باعىشتاپ، دۇعا جاساۋ ماقساتىندا مارقۇمنىڭ جىلدىق اسىنا شاقىرامىز.

 ۋاقىتى: 24 قازان 2026 جىل، ساعات 13:00  
 
مەكەنجايى: الماتى قالاسى، گوگول كوشەسى، 40، «جۇلدىز» مەيرامحاناسى 

اس بەرۋشىلەر: مارقۇمنىڭ وتباسى، باۋىرلارى مەن جاقىندارى.

مارقۇمنىڭ يمانى سالامات، جانى ءجانناتتا بولسىن! اللا الدىنان جارىلقاپ، جاتقان جەرىن جايلى ەتسىن.