الماتى وبلىسىندا الەۋەتتى ينۆەستورلارمەن كولىك-لوگيستيكالىق حاب سالۋ، ءوندىرىس ورىندارىن اشۋ جانە «سوكول» سپورتتىق-تەحنيكالىق كەشەنىن دامىتۋ ماسەلەلەرى تالقىلاندى.

الماتى وبلىسىنىڭ اكىمى شىڭعىس ءارىنوۆ ىلە اۋدانىندا ورنالاسقان «سوكول» سپورتتىق-تەحنيكالىق كەشەنىنە بارىپ، جۇڭگو حالىق رەسپۋبليكاسىنىڭ دەلەگاسياسىمەن كەلىسسوز جۇرگىزدى.

دەلەگاسيانى قىتايدىڭ سزيانسۋ پروۆينسياسىنا قاراستى نانكين قالاسى سيۋانۋ اۋدانى حالىق ۇكىمەتىنىڭ باسشىسى تۋن سياوسزيا (Tong Xiaojia) باستاپ كەلدى. ونىڭ قۇرامىندا مەملەكەتتىك ورگانداردىڭ، بيزنەس وكىلدەرىنىڭ جانە شانحاي ىنتىماقتاستىق ۇيىمى ەنەرگەتيكالىق ورتالىعىنىڭ وكىلدەرى بولدى.

كەزدەسۋگە «سوكول» سپورتتىق-تەحنيكالىق كەشەنىنىڭ باس ديرەكتورى داستان يبراگيموۆ تا قاتىستى.

كەلىسسوز بارىسىندا شەتەلدىك سەرىكتەستەر «سوكول» كەشەنىنىڭ باسشىلىعىمەن بىرلەسىپ، الماتى وبلىسىندا ءبىرقاتار ينۆەستيسيالىق جوبانى جۇزەگە اسىرۋعا قىزىعۋشىلىق تانىتتى.

اتاپ ايتقاندا، قالا قۇرىلىسى جوبالارى، ءىرى جانە شاعىن ءوندىرىس ورىندارىن اشۋ، سونداي-اق كولىك-لوگيستيكالىق حاب سالۋ ماسەلەلەرى تالقىلاندى.

ءوز كەزەگىندە الماتى وبلىسىنىڭ اكىمى شىڭعىس ءارىنوۆ ءوڭىردىڭ ناقتى ينۆەستيسيالىق ۇسىنىستار مەن ۇزاق مەرزىمدى ىسكەرلىك ىنتىماقتاستىققا اشىق ەكەنىن اتاپ ءوتتى.

وبلىس باسشىسىنىڭ ايتۋىنشا، وڭىردە ينۆەستورلاردى ءىرى نەمەسە شاعىن دەپ بولمەيدى. ەڭ باستىسى، ناقتى اتقارىلعان جۇمىس، تارتىلعان ينۆەستيسيا كولەمى جانە جۇزەگە اسىرىلعان جوبالاردىڭ ناتيجەسى.

سونداي-اق ول وبلىستىڭ اۋقىمدى ينۆەستيسيالىق باستامالارمەن قاتار شاعىن جانە ورتا بيزنەستى دامىتۋعا دا مۇددەلى ەكەنىن جەتكىزدى.

كەزدەسۋدە «سوكول» سپورتتىق-تەحنيكالىق كەشەنىنىڭ دامۋ پەرسپەكتيۆالارى مەن ونىڭ بىرلەسكەن ينۆەستيسيالىق جوبالارعا قاتىسۋ مۇمكىندىكتەرىنە ەرەكشە نازار اۋدارىلدى.

تاراپتار الداعى ىنتىماقتاستىقتىڭ نەگىزگى باعىتتارىن تالقىلادى.