«ويان، قازاق» جوباسىنىڭ اۆتورلارى كورەرمەن نازارىنا «قارا التىن» دەپ اتالاتىن جاڭا تىڭ تۋىندى ۇسىنىپ وتىر. اتالعان كوركەم فيلم بۇگىننەن باستاپ ەلىمىزدىڭ بارلىق كينوتەاترلارىندا كورسەتىلمەك.
تۋىندىنىڭ پروديۋسەرى ايساۋلە ءابىلدا بۇعان دەيىن بەرگەن سۇحباتىندا كارتينانىڭ باستى يدەياسى مەن مازمۇنىنا كەڭىنەن توقتالعان ەدى. ونىڭ ايتۋىنشا، بۇل تۋىندى وڭاي جولمەن بايىپ كەتۋدىڭ جولىن كورسەتەتىن فيلم ەمەس. كەرىسىنشە، قيىندىققا مويىمايتىن قايسارلىق پەن قاجىماس جىگەردى بەينەلەيدى.
ءفيلمنىڭ سيۋجەت جەلىسى كورەرمەندى وزىنە باۋراپ الادى. باستى كەيىپكەر – قاسىم يساعالييەۆ ءار قادامىن الدىن الا مۇقيات ەسەپتەيتىن، سۋىققاندى ءارى ينتەللەكتۋال كاسىپكەر. اتالعان فيلم تۋرالى العاشقى كۇننەن باستاپ قالىڭ جۇرتشىلىق جاعىمدى پىكىرلەر جازدى.
كينو تۋىندىسى تۋرالى زيالى قاۋىم وكىلدەرى مەن بەلگىلى تۇلعالار دا ءوز ويلارىن ورتاعا سالدى.
ايگۇل يسماكوۆا ءوزىنىڭ facebook پاراقشاسىندا ءفيلمنىڭ يدەيالىق تەرەڭدىگىنە توقتالىپ، تۋىندىدا شاكارىم قۇدايبەردى ۇلى ۇرپاعىنىڭ ءوز كاسىبىن قورعاۋ جولىنداعى كۇرەسى نانىمدى كورىنىس تاپقانىن ايتادى. ونىڭ سوزىنشە، مۇندا ادامنىڭ جانى مەن ءتان تالاسى، ار مەن ۇياتتان اتتاماعاندار مەن ادامدىقتى بەلشەدەن باسقانداردىڭ ارپالىسى وتە شەبەر بەينەلەنگەن. "بۇل – بۇگىنگى وتانشىل ءار ازامات كورەتىن فيلم"، – دەپ باعا بەردى ول.
ال بەلگىلى جۋرناليست، «Qazaqstan» تەلەراديوكورپاراسياسىنىڭ الماتىداعى مەدياورتالىعىنىڭ باسشىسى ەرقانات كوپجاسار ۇلى ءفيلمنىڭ دراماتۋرگيالىق قۋاتىن ەرەكشە اتاپ ءوتتى. ول كارتينانىڭ شىنايى وقيعاعا نەگىزدەلگەنىن اتاپ ءوتىپ، تۋىندىدا بيلىك بيۋروكراتياسى، رەيدەرلىك، وليگوپوليا جانە سوت جۇيەسى سياقتى كۇردەلى ماسەلەلەر اشىق سۋرەتتەلگەنىن جازدى. ءتىپتى كورەرمەندى ويلاندىرىپ، ەلدەگى ءىرى وندىرىستىك ورىندار مەن جۇيە تابيعاتى تۋرالى ۇلكەن سۇراقتارعا جاۋاپ ىزدەۋگە يتەرمەلەيتىنىن جەتكىزدى. ونىڭ پىكىرىنشە، فيلم ادام بويىنداعى كۇرەسكەرلىك قابىلەتتى وياتىپ، ەڭسە تىكتەۋگە دەم بەرەدى.
سونداي-اق اقىن، جۋرناليست ۇلاربەك نۇرعالىم ۇلى دا فيلم تۋرالى جىلى لەبىزىن ءبىلدىردى. ول كورەرمەندى ارزان دۇنيەمەن الداماي-اق، شىنايى ونەر ارقىلى باۋراپ الۋعا بولاتىنىن بۇل فيلم تولىق دالەلدەگەنىن ايتىپ، «بارىڭىزدار، كورسەڭىزدەر بولادى» دەپ كوپشىلىكتى كينوتەاترلارعا شاقىردى.
العاشقى كورسەتىلىمنەن-اق كورەرمەننىڭ ىستىق ىقىلاسىنا بولەنگەن «قارا التىن» تۋىندىسى وتاندىق كينو ونەرىندەگى ساپالى ءارى سالماقتى جوبالاردىڭ بىرىنە اينالارى ءسوزسىز.
