العاشقى FIA Central Asia Drift Cup جارىسىنان كەيىن «سوكول» سپورتتىق-تەحنيكالىق كەشەنىنىڭ باسشىلىعى FIA Asia-Pacific كونگرەسىنە قاتىستى. ول 29 قىركۇيەكتە فيليپپيندە باستالىپ، 1 قازانعا دەيىن جالعاسادى.

بوراكايدا ستك «سوكول» باسشىلىعىنىڭ اتىنان داستان يبراگيموۆ FIA پرەزيدەنتى موحاممەد بەن سۋلايەممەن كەزدەستى. تاراپتار قازاقستاندا FIA اياسىندا جارىستار وتكىزۋ جوسپارىن تالقىلادى. اتاپ ايتقاندا، ستك «سوكول» تراسساسىندا ءوتۋى مۇمكىن تۋرنيرلەر تۋرالى ءسوز بولدى.

كونگرەسكە ازيا مەن تىنىق مۇحيتى وڭىرىندەگى FIA كلۋبتارىنىڭ 120-عا جۋىق وكىلى قاتىسىپ جاتىر. بۇل — فەدەراسيانىڭ 2026 جىلعى سوڭعى وڭىرلىك كەزدەسۋى. قاتىسۋشىلار اۆتوسپورت پەن كولىك جۇيەسىن دامىتۋعا قاتىستى تاجىريبە الماسىپ، ءوز ەلدەرىندە قولدانۋعا بولاتىن شەشىمدەردى تالقىلايدى.

كونگرەسس باعدارلاماسىنا جول قوزعالىسى قاۋىپسىزدىگى، كولىك سالاسىنداعى يننوۆاسيالار، تۇراقتى ءارى قولجەتىمدى كولىك، تۋريزم جانە جول قوزعالىسىنا قاتىسۋشىلاردىڭ وزگەرىپ جاتقان قاجەتتىلىكتەرى ەنگىزىلگەن. سپورت باعىتى بويىنشا اۆتوسپورتقا قاتىسۋشىلار سانىن ارتتىرۋ، باستاپقى جانە وڭىرلىك دەڭگەيدەگى جارىستاردى قولداۋ، سپورتتى كوپشىلىككە قولجەتىمدى ەتۋ ماسەلەلەرى قارالادى.

بۇل كۇن ءتارتىبى ستك «سوكول» كوزدەيتىن ماقساتتارمەن دە ۇندەسەدى. اۆتودروم اۆتوكولىك اۋەسقويلارى مەن سپورتشىلارعا جىلدامدىققا دەگەن قىزىعۋشىلىعىن جالپىعا ورتاق جولداردا ەمەس، ارنايى جارىس تراسساسىندا جۇزەگە اسىرۋعا مۇمكىندىك بەرەتىن جاعداي قالىپتاستىرۋدى كوزدەيدى. Central Asia Drift Cup جارىسى كەشەننىڭ حالىقارالىق دەڭگەيدەگى جارىستاردى قابىلداي الاتىنىن كورسەتتى.

جۋىردا ستك «سوكول» 2027–2028 جىلدارعا ارنالعان سپورتتىق ءىس-شارالار باعدارلاماسىن جاريالاۋدى جوسپارلاپ وتىر.