1 قازان – حالىقارالىق قارتتار كۇنىنە وراي سەمەي قالاسىندا سالتاناتتى قابىلداۋ شاراسى ءوتتى. قاريالارعا قۇرمەت كورسەتۋگە ارنالعان جيىنعا وبلىس اكىمى بەرىك ءۋالي، ءوڭىردىڭ قالا-اۋداندارىنان ارداگەرلەر قاتىستى.

ايماق باسشىسى ارداگەرلەردى مەرەكەمەن قۇتتىقتاپ، ولاردىڭ قوعامداعى ورنى مەن سىڭىرگەن ەڭبەگىنە قۇرمەت ءبىلدىردى.

«بارشاڭىزدى حالىقارالىق قارتتار كۇنىمەن شىن جۇرەكتەن قۇتتىقتايمىن! قازاقتا: «قارتى بار ءۇيدىڭ قازىناسى بار»، – دەيدى. راسىندا، ۇلكەندى سىيلاپ، اقساقالدى تورگە شىعارىپ، اق جاۋلىقتى انانى ارداقتاعان اتالى جولدى بۇگىندە جالعاستىرماق نيەتىمىز بار. سوندىقتان بۇگىنگى باسقوسۋىمىزدىڭ «قارتتارعا قۇرمەت – ۇرپاققا مىندەت» دەپ اتالۋىنىڭ وزىندە ۇلكەن ءمان جاتىر. سىزدەردىڭ ەلگە سىڭىرگەن قىزمەتتەرىڭىز بەن ومىردەن تۇيگەن تاجىريبەلەرىڭىز كەيىنگى بۋىن ءۇشىن ۇلگى-ونەگە، باعا جەتپەس قازىنا. مەملەكەت باسشىسى قاسىم-جومارت كەمەل ۇلى توقايەۆ اعا بۋىنعا دەگەن قۇرمەت پەن ولاردىڭ الەۋمەتتىك ءال-اۋقاتىن ارتتىرۋ ماسەلەسىنە ەرەكشە ءمان بەرىپ كەلەدى. «ارداگەرلەر تۋرالى» زاڭ وسى باعىتتاعى مەملەكەتتىك قولداۋدى جۇيەلەۋگە بەرىك نەگىز قالادى. پرەزيدەنتىمىز قوعامدا «زاڭ مەن ءتارتىپ»، «ادال ازامات» قاعيداتتارىن ورنىقتىرۋعا ەرەكشە ءمان بەرەدى. بۇل قۇندىلىقتاردى جاس ۇرپاقتىڭ بويىنا سىڭىرۋدە سىزدەردىڭ اقىل-كەڭەستەرىڭىز بەن ومىرلىك تاجىريبەلەرىڭىزدىڭ ورنى بولەك. سىزدەرگە زور دەنساۋلىق، ۇزاق عۇمىر، جاقىندارىڭىزعا اماندىق، شاڭىراقتارىڭىزعا باق-بەرەكە تىلەيمىن»، – دەدى بەرىك ءۋالي.

شارا بارىسىندا ءوڭىردىڭ ءار سالاسىندا ەڭبەگىمەن ەلەنگەن ارداگەرلەر «اباي وبلىسىنا سىڭىرگەن ەڭبەگى ءۇشىن» توسبەلگىسىمەن، وبلىس اكىمىنىڭ العىس حاتتارىمەن، رەسپۋبليكالىق ارداگەرلەر ۇيىمىنىڭ «قۇرمەت» توسبەلگىسىمەن جانە العىس حاتتارىمەن ماراپاتتالدى. 

جىلى راۋىشتە وتكەن كەزدەسۋدە ارداگەرلەر ەلدىڭ بەرەكە-بىرلىگى، جاستاردىڭ بولاشاعى تۋرالى ويلارىن ورتاعا سالدى. 

اباي وبلىسىندا ارداگەرلەردى قولداۋعا باعىتتالعان جۇمىستار جۇيەلى تۇردە جۇرگىزىلۋدە. بيىل ۇلى وتان سوعىسىنىڭ ارداگەرىنە 5 ميلليون تەڭگە كولەمىندە ءبىرجولعى الەۋمەتتىك كومەك كورسەتىلدى. جەڭىس كۇنى قارساڭىندا 1 146 ادامعا 158 مىڭ تەڭگە كولەمىندە ءبىرجولعى الەۋمەتتىك كومەك بەرىلدى.

بۇگىندە ايماقتا 2 639 زەينەتكەر ارنايى الەۋمەتتىك قىزمەتتەرمەن قامتىلعان. قارت جانداردىڭ بەلسەندى ءومىر سالتىن جالعاستىرۋىنا دا جاعداي جاسالۋدا. قازىرگى تاڭدا وبلىسىمىزدا 395 باستاۋىش ارداگەرلەر ۇيىمى، 2 قالالىق جانە 10 اۋداندىق ارداگەرلەر كەڭەسى جۇمىس ىستەيدى.

وڭىردە 2 «بەلسەندى ۇزاق ءومىر ءسۇرۋ ورتالىعى» جۇمىس ىستەيدى. بيىل ولاردىڭ قاتارىنا كۋرچاتوۆ قالاسىندا اشىلعان جاڭا ورتالىق قوسىلدى. سەمەي قالاسىنداعى ورتالىقتىڭ 3 فيليالى بار. قازىرگى تاڭدا بۇل ورتالىقتاردا 608 زەينەتكەر ءتۇرلى قىزمەتتەرمەن قامتىلىپ وتىر.