بۇگىن اباي ۋنيۆەرسيتەتىندە «بالا تۇلعاسى جانە پەداگوگ كاسىبيلىگى: مەكتەپكە دەيىنگى ءبىلىم بەرۋدەگى ىرگەلى جانە قولدانبالى زەرتتەۋلەر» اتتى حالىقارالىق عىلىمي-تاجىريبەلىك Open Space ءوتتى.

ءىس-شارا مەكتەپكە دەيىنگى ءبىلىم بەرۋ جۇيەسىندەگى وزەكتى ماسەلەلەردى تالقىلاۋعا، بالا تۇلعاسىن قالىپتاستىرۋدىڭ عىلىمي-پەداگوگيكالىق نەگىزدەرىن زەردەلەۋگە جانە ءبىلىم بەرۋ تاجىريبەسىنە زاماناۋي زەرتتەۋ ناتيجەلەرىن ەنگىزۋ جولدارىن قاراستىرۋعا ارنالدى. حالىقارالىق عىلىمي-تاجىريبەلىك الاڭدا مەكتەپكە دەيىنگى ءبىلىم بەرۋ ساپاسىن ارتتىرۋ، بالانىڭ جەكە ەرەكشەلىكتەرىن ەسكەرە وتىرىپ دامىتۋ، پەداگوگتىڭ كاسىبي قۇزىرەتتىلىگىن جەتىلدىرۋ جانە ءبىلىم بەرۋ ۇدەرىسىنە يننوۆاسيالىق تاسىلدەردى ەنگىزۋ ماسەلەلەرى تالقىلاندى. سونىمەن قاتار، ىرگەلى جانە قولدانبالى زەرتتەۋلەردىڭ ناتيجەلەرىن تاجىريبەدە قولدانۋ، پەداگوگيكالىق عىلىم مەن ءبىلىم بەرۋ ۇيىمدارى اراسىنداعى بايلانىستى نىعايتۋ ماسەلەلەرىنە نازار اۋدارىلدى.

بۇگىنگى بالا اقپاراتتى بۇرىنعىدان ەرتە قابىلدايدى، سيفرلىق ورتاعا تەز بەيىمدەلەدى، سۇراق قويادى، ءوز ويىن ەركىن جەتكىزۋگە ۇمتىلادى. ونىڭ سويلەۋى، ويلاۋى، قيالى، قارىم-قاتىناسى مەن ەموسياسىن باسقارۋى دا وزىندىك ەرەكشەلىككە يە. مۇنداي وزگەرىس بالاباقشاداعى تاربيەشىگە دە جاڭا مىندەت جۇكتەيدى. بالاداعى دامۋ ەرەكشەلىگىن ەرتە بايقاۋ، ونىڭ قابىلەتىن اشۋ جانە قيىندىقتاردىڭ الدىن الۋ ءۇشىن پەداگوگقا قانداي ءبىلىم مەن قۇرال قاجەت؟ بۇگىنگى تاربيەشى قانداي بولۋى كەرەك؟ Open Space بارىسىندا ماماندار وسى سۇراقتار بويىنشا باياندامالار جاسادى. جيىندا وتاندىق جانە شەتەلدىك عالىمدار مەن پەداگوگتار تاجىريبە الماسىپ، مەكتەپكە دەيىنگى ءبىلىم بەرۋدى جەتىلدىرۋگە باعىتتالعان ناقتى ۇسىنىستارىن ۇسىندى. الاڭدا عىلىمي-ادىستەمەلىك كورمە، پلەنارلىق جانە فوكۋس-سەسسيالار، شەبەرلىك سىنىبى قاراستىرىلدى.

Open Space جۇمىسىنا سايكەس، №187 بوبەكجاي-بالاباقشاسى بازاسىندا «USHQYN LAB» عىلىمي-يننوۆاسيالىق زەرتحاناسى اشىلعانىن ايتا كەتۋ كەرەك. زەرتحانا عىلىم مەن بالاباقشا تاجىريبەسىن توعىستىرۋدى ماقسات ەتەدى.

ءىس-شارا پەداگوگيكا عىلىمدارىنىڭ كانديداتى، قاۋىمداستىرىلعان پروفەسسور ۇلبوسىن قىياقبايەۆانىڭ 60 جاس مەرەيتويىنا ارنالعان. اباي اتىنداعى قازۇپۋ باسقارما توراعاسى-رەكتور بولات تىلەپ مەرەيتوي يەسىنە قۇتتىقتاۋ ءسوزىن جولداپ، «اباي» توسبەلگىسى تابىستالدى. سونداي-اق ق ر وقۋ-اعارتۋ مينيسترلىگىنىڭ ۆيسە-مينيسترى شىنار اقپاروۆانىڭ قۇتتىقتاۋ حاتى مەن ەلىمىزدىڭ ءبىرقاتار جوعارى وقۋ ورنى باسشىلارى اتىنان جولدانعان قۇتتىقتاۋلار وقىلىپ، سىي-سياپاتتار جاسالدى.

قازىرگى مەكتەپكە دەيىنگى ءبىلىم بەرۋ جۇيەسىندەگى باستى مىندەتتەردىڭ ءبىرى – بالانىڭ جەكە تۇلعالىق دامۋىن قامتاماسىز ەتە وتىرىپ، ونىڭ تانىمدىق قابىلەتتەرىن، شىعارماشىلىق الەۋەتىن، الەۋمەتتىك داعدىلارىن قالىپتاستىرۋ. بۇل تۇرعىدا پەداگوگتىڭ كاسىبي شەبەرلىگى، عىلىمي-ادىستەمەلىك دايارلىعى مەن ءار بالانىڭ جەكە ەرەكشەلىكتەرىن ەسكەرە ءبىلۋى ەرەكشە ماڭىزدى. اتالعان مىندەتتەردى ءتيىمدى شەشۋ ءۇشىن پەداگوگيكالىق ادىستەردى كەڭىنەن قولدانىپ، تاربيەشىلەردىڭ كاسىبي بىلىكتىلىگىن ۇزدىكسىز ارتتىرۋ، يننوۆاسيالىق تەحنولوگيالاردى ەنگىزۋ قاجەت.

حالىقارالىق عىلىمي-تاجىريبەلىك Open Space وسى باعىتتاعى وزەكتى ماسەلەلەردى تالقىلاۋعا، تاجىريبە الماسۋعا، مەكتەپكە دەيىنگى ءبىلىم بەرۋ ساپاسىن ارتتىرۋعا باعىتتالعان ءتيىمدى شەشىمدەردى قاراستىرۋعا مۇمكىندىك بەردى.

«Abai University» مەديا ورتالىعى