18 قاراشا كۇنى الماتى قالاسىنىڭ بوستاندىق اۋدانىندا ۇلتتىق زياتكەرلىك ويىن- توعىزقۇمالاقتان اۋداندىق BOSTAN CUP ءتۋرنيرى ءوتتى. جارىسقا ۇلتتىق ويىنعا، زياتكەرلىك سپورتقا جانە باسەكەلەستىككە قىزىعۋشىلىق تانىتقان 100- دەن استام بالا مەن ءجاسوسپىرىم قاتىستى.

تۋرنير الماتى قالاسى جاستار ساياساتى باسقارماسىنىڭ قولداۋىمەن جانە «توعىزقۇمالاق» بوس ۋاقىتتى ۇيىمداستىرۋ ورتالىعىنىڭ ۇيىمداستىرۋىمەن وقۋشىلاردىڭ يننوۆاسيالىق شىعارماشىلىق ورتالىعىندا وتكىزىلدى.
جارىس بەس كەزەڭ بويىنشا ۇيىمداستىرىلىپ، قاتىسۋشىلار وزدەرىنىڭ شەبەرلىكتەرىن، ستراتەگيالىق ويلاۋ قابىلەتتەرىن، زەيىندەرىن جانە دۇرىس شەشىم قابىلداۋ داعدىلارىن كورسەتە ءبىلدى. توعىزقۇمالاق- تەك ويىن ەرەجەلەرىن ءبىلۋدى عانا ەمەس، سونىمەن قاتار لوگيكانى، شىدامدىلىقتى، ەسەپتەۋدى جانە وزىندىك تاكتيكا قۇرا ءبىلۋدى تالاپ ەتەتىن زياتكەرلىك ويىن.
تۋرنير اياسىندا وسكەلەڭ ۇرپاق اراسىندا ۇلتتىق زياتكەرلىك سپورتتى كەڭىنەن ناسيحاتتاۋعا، مادەني داستۇرلەردى ساقتاۋعا جانە بالالار مەن جاسوسپىرىمدەردىڭ ينتەللەكتۋالدىق قابىلەتتەرىن دامىتۋعا ەرەكشە كوڭىل ءبولىندى.
BOSTAN CUP ءتۋرنيرى قاتىسۋشىلار ءۇشىن ءوزارا قارىم- قاتىناس ورناتۋعا، تاجىريبە الماسۋعا جانە سپورتتىق شەبەرلىكتەرىن كورسەتۋگە مۇمكىندىك بەرەتىن الاڭعا اينالدى. جاس ويىنشىلار ءوز كۇشتەرىن سىناپ، توعىزقۇمالاق اۋەسقويلارىمەن تانىسىپ، جاڭا جارىس تاجىريبەسىنە يە بولدى.

تۋرنير قىزىعۋشىلىققا، دوستىق باسەكەگە جانە ۇلتتىق قۇندىلىقتارعا دەگەن قۇرمەتكە تولى اتموسفەرادا ءوتتى. بۇل شارا جاستار اراسىندا زياتكەرلىك سپورت تۇرلەرىنە دەگەن قىزىعۋشىلىقتىڭ جوعارى ەكەنىن جانە وسكەلەڭ ۇرپاقتىڭ جان- جاقتى دامۋى ءۇشىن وسىنداي ءىس- شارالاردىڭ ماڭىزدىلىعىن تاعى ءبىر مارتە كورسەتتى.