الماتى قالاسىندا احمەت بايتۇرسىن ۇلى اتىنداعى «قازاق ءتىلىنىڭ ۇزدىك وقىتۋشىسى» قالالىق كونكۋرسىنا وتىنىمدەر قابىلداۋ باستالدى.
كونكۋرس «حالىقارالىق «قازاق ءتىلى» قوعامى» قوعامدىق بىرلەستىگىنىڭ الماتى قالالىق فيليالىنىڭ ۇيىمداستىرۋىمەن وتكىزىلەدى. بۇگىندە مەملەكەتتىك ءتىلدى مەڭگەرۋگە دەگەن سۇرانىس ەڭبەكتەگەن بالادان ەڭكەيگەن قارتقا دەيىن ارتىپ وتىر، سوندىقتان بىلىكتى وقىتۋشى كادرلاردى قولداۋ، ولاردىڭ كاسىبي شەبەرلىگى مەن شىعارماشىلىعىن شىڭداۋ اسا وزەكتى.
كونكۋرستىڭ ماقساتى – قازاق ءتىلىن وقىتۋشىلاردىڭ (مۇعالىمدەردىڭ) كاسىبي بىلىكتىلىگىن ارتتىرۋ، ادىستەمەلىك شەبەرلىگىن شىڭداۋ، شىعارماشىلىق جۇمىستارمەن اينالىسۋىنا مۇمكىندىك جاساۋ جانە ۇزدىك تاجىريبەنى ناسيحاتتاۋ.
كونكۋرسقا بارلىق دەڭگەيدەگى قازاق ءتىلى وقىتۋشىلارى قاتىسا الادى: ەرەسەكتەرگە ءتىل ۇيرەتەتىن ماماندار، جوعارى وقۋ ورىندارى مەن ارنايى ورتا ءبىلىم بەرۋ ۇيىمدارىنىڭ وقىتۋشىلارى، ورتا جانە باستاۋىش مەكتەپ مۇعالىمدەرى، سونداي-اق بالاباقشا پەداگوگتەرى.
قاتىسۋشىلار كونكۋرسقا مىناداي ونىمدەرىن ۇسىنا الادى:
1. اۆتورلىق وقۋ باعدارلامالارى – قازاق ءتىلىن وقىتۋداعى وزىندىك جۇيە مەن تىڭ تاسىلدەر.
2. ادىستەمەلىك كەشەندەر – ساباق وتكىزۋگە ارنالعان جۇيەلى وقۋ-ادىستەمەلىك ماتەريالدار.
3. وقۋ قۇرالدارى جانە وزگە دە ادىستەمەلىك ونىمدەر – ءتىل ۇيرەنۋشىلەرگە ارنالعان باسىلىمدار مەن ازىرلەمەلەر.
ۇسىنىلعان جۇمىستاردى بەلگىلى پەداگوگتەر، ادىسكەر عالىمدار، قوعامدىق ۇيىمداردىڭ وكىلدەرى مەن قازاق ءتىلىن وقىتۋدىڭ كاسىبي بىلىكتى ماماندارىنان قۇرالعان قازىلار القاسى باعالايدى.
باس جۇلدە، ءبىرىنشى، ەكىنشى جانە ءۇشىنشى ورىن يەگەرلەرىنە ءتيىستى دارەجەدەگى ديپلومدار مەن باعالى سىيلىقتار، قاتىسۋشىلارعا العىس حاتتار مەن ەستەلىك سىيلىقتار تابىستالادى.
اتالعان ءىس-شارا مەملەكەتتىك ءتىل ساياساتىن ناسيحاتتاۋعا، قازاق ءتىلى وقىتۋشىلارىنىڭ قوعامدىق مارتەبەسى مەن بەدەلىن ارتتىرۋعا جانە قازاق ءتىلىن ۇيرەتۋ ءىسىنىڭ ساپاسىن كوتەرۋگە باعىتتالعان. كونكۋرس بارىسىندا وقىتۋشىلار ارىپتەستەرىمەن تاجىريبە الماسىپ، ءتۇرلى ادىستەمەلەرمەن تانىسۋعا مۇمكىندىك الادى.
وتىنىمدەردى قابىلداۋ مەرزىمى: 2026 جىلدىڭ 25 قاراشاسىنا دەيىن
ءوتىنىم بەرۋ: https://forms.gle/kC2suLywtWL1Vxue7 سىلتەمەسى بويىنشا Google فورمانى تولتىرۋ ارقىلى.
جەڭىمپازداردى ماراپاتتاۋ ءراسىمىنىڭ وتەتىن كۇنى: 2026 جىلعى 9 جەلتوقسان.
وتەتىن ورنى: الماتى قالاسى، تولە بي كوشەسى، 86، اكت زالى.
ەلەكتروندىق پوشتا: kazqogam.competition@gmail.com
بايلانىس تەلەفونى: +7 701 664 2721.