الماتى وبلىسىندا دۇنيەجۇزىلىك تازالىق كۇنىنە وراي جالپىحالىقتىق سەنبىلىك ءوتتى. شاراعا وبلىس تۇرعىندارى، ەرىكتىلەر مەن جاستار قاتىستى.
ولار تاڭمەن تالاسا تۇرىپ ساياباقتار مەن اۋلالاردى قوقىستان تازارتتى. سونداي-اق قونايەۆ قالاسىندا 200 ءتۇپ الما اعاشىنىڭ كوشەتى وتىرعىزىلدى. يگى ىسكە اتسالىسقان وبلىس اكىمى شىڭعىس ءارىنوۆ، قورشاعان ورتانى تازا ۇستاۋ – بارشاعا ورتاق مىندەت ەكەنىن اتاپ ءوتتى. سونداي-اق ءوڭىر تۇرعىندارىن «تازا قازاقستان» باستاماسىنا بەلسەندى قاتىسىپ، ەلدىمەكەندەردىڭ تازالىعى مەن كوركەيۋىنە ۇلەس قوسۋعا شاقىردى.

الماتى وبلىسىندا رەسپۋبليكالىق «تازا قازاقستان» ەكولوگيالىق شاراسى جۇيەلى تۇردە وتكىزىلەدى. بۇگىننىڭ وزىندە وبلىس كولەمىندە وتكەن سەنبىلىككە 40 مىڭنان استام ادام قاتىسىپ، 2230 توننا قالدىق شىعارىلدى. 762 گەكتار اۋماق تازارتىلىپ، بۇل جۇمىسقا جۇمىسقا 400-دەن اسا تەحنيكا جۇمىلدىرىلعان.

« بىزدە تازالىق جۇمىستارى 31 اپتا بويى جالعاسىپ كەلەدى. كۇنى بۇگىنگە دەيىن تازالىق جۇمىستارىنا 730 مىڭعا جۋىق ادام قاتىسىپ، 10 مىڭ گەكتار اۋماق تازالاندى. سونىمەن قوسا 104 081 ءتۇپ اعاش وتىرعىزىلدى . ءىس-شارالارعا 4200-دەن استام تەحنيكا پايدالانىلدى» – دەيدى الماتى وبلىستىق تۇرعىن ۇي-كوممۋنالدىق شارۋاشىلىق جانە اباتتاندىرۋ باسقارماسىنىڭ وكىلى الينا تۇسىپبايەۆا.

سەنبىلىككە قاتىسۋشىلار ءاربىر ەلدىمەكەننىڭ تازالىعى تۇرعىندارعا تىكەلەي بايلانىستى ەكەنىن ايتتى.

«وسىنداي ونەگەلى ءىستىڭ وتەتىنىن ەستىگەن بويدا قۋانا-قۋانا كەلدىك.ءقازىر قالامىز تەز كوركەيىپ كەلەدى. ەندى وتىرعىزعان اعاشتار جايقالىپ، وسى ماڭ بالالاردىڭ شات كۇلكىسىنە تولى، نەمەرەلەرىمىز ەركىن ويناپ جۇرەتىن ورىنعا اينالسا ەكەن دەيمىز. بۇگىنگى شارا ءبىزدىڭ بىرلىگىمىزدى انىق كورسەتتى»، – دەدى وبلىستىق شەشەن-ينگۋش ەتنومادەني بىرلەستىنىڭ مۇشەسى شاحيت لابازانوۆ.

2026–2030 جىلدارعا ارنالعان جوسپارعا سايكەس، الماتى وبلىسىندا جىل سايىن شامامەن 220 مىڭ ءتۇپ اعاش وتىرعىزۋ كوزدەلگەن.