ادەبيەت سالاسىنداعى نوبەل سىيلىعىنىڭ لاۋرەاتى، بەلگىلى جۇڭگو جازۋشىسى مو يان «كىتاپ وقيتىن ۇلت» رەسپۋبليكالىق كىتاپ وقۋ مارافونىنا قاتىسۋشىلارىنا ۇندەۋ جولداپ، قازاقستاندىق وقىرماندارعا شابىت، تابىس جانە ادەبيەت الەمىندە جاڭا جاڭالىقتار اشۋدى تىلەدى.
ءوزىنىڭ بەينەۇندەۋىندە جازۋشى «سارىمساق جىرى» كىتابى قازاق تىلىنە اۋدارىلىپ، مارافون اياسىندا وقىلاتىن شىعارمالار تىزىمىنە ەنگەنىن اتاپ ءوتتى.
«مەنىڭ «سارىمساق جىرى» رومانىمنىڭ قازاق تىلىنە اۋدارىلىپ، وسى مارافون شىعارمالار تىزىمىنە ەنگەنىنە وتە قۋانىشتىمىن»، — دەدى مو يان.
جازۋشى سونداي-اق قازاقستانعا جاساعان ساپارى مەن قازاقستاندىق قالامگەرلەرمەن كەزدەسۋلەرى تۋرالى ايتتى. ول قازاق ادەبيەتىمەن تانىسۋ ەكى ەلدىڭ ادەبي داستۇرلەرى اراسىندا ەرەكشە جاقىندىق بار ەكەنىن سەزىنۋگە مۇمكىندىك بەرگەنىن اتاپ ءوتتى.
«قازاق ادەبيەتى ماعان وتە جاقىن ءارى قىمبات. ويتكەنى سىزدەردىڭ شىعارمالارىڭىزدا سۋرەتتەلەتىن ءومىردىڭ كوپ قىرى ءوزىمنىڭ باسىمنان وتكەرگەن جاعدايلارمەن ۇندەسەدى»، — دەدى جازۋشى.
مو يان «كىتاپ وقيتىن ۇلت» باستاماسىنىڭ مادەنيەت پەن قوعامدى دامىتۋداعى ماڭىزىن دا ەرەكشە اتاپ ءوتتى.
«جالپى، كىتاپ وقۋعا ارنالعان وسىنداي جالپىۇلتتىق مارافون ۇيىمداستىرعاندارىڭىز وتە جاقسى. بۇل — ۇلتتىق مادەنيەتتى دامىتۋعا ىقپال ەتىپ قانا قويماي، قوعامنىڭ دامۋىنا دا ەلەۋلى ۇلەس قوساتىن يگى ءارى ىزگى ءىس»، — دەدى ول.
مارافونعا قاتىسۋشىلارعا ارناعان سوزىندە جازۋشى ولارعا كىتاپ الەمىنە ساپار بارىسىندا شابىت تىلەدى.
«كىتاپ الەمىنە ساياحات جاساپ، ءبىلىم مەن دانالىقتىڭ بيىگىنە ۇمتىلعان ءاربىر قاتىسۋشىعا زور شابىت تىلەيمىن! ءاربىر پاراق جۇرەكتەرىڭىزگە جارىق سىيلاپ، ىشكى جان دۇنيەلەرىڭىزدى بايىتا بەرسىن. كىتاپ ءاردايىم قولدارىڭىزدان تۇسپەسىن، ال بىلىمگە ۇمتىلىستارىڭىز بەن ءوزىن-وزى دامىتۋ جولىنداعى تالپىنىستارىڭىز ءاردايىم جەتىستىكپەن جالعاسا بەرسىن!»
ءسوز سوڭىندا مو يان قازاقستاندىق وقىرماندارعا العىسىن ءبىلدىرىپ، ولاردى بىرگە جاڭا ادەبي كوكجيەكتەردى اشۋعا شاقىردى.
مو يان — ادەبيەت سالاسىنداعى نوبەل سىيلىعىنىڭ لاۋرەاتى. ول 2012 جىلى ادەبيەت بويىنشا نوبەل سىيلىعىنا يە بولدى.
جازۋشىنىڭ ەڭ تانىمال شىعارمالارىنىڭ قاتارىندا «قىزىل گاوليان» جانە «سارىمساق جىرى» روماندارى بار. نوبەل كوميتەتىنىڭ مالىمەتىنشە، ونىڭ شىعارماشىلىعىندا ءداستۇرلى جۇڭگو ادەبيەتى مەن اۋىز ادەبيەتى داستۇرلەرىنىڭ ەلەمەنتتەرى زاماناۋي الەۋمەتتىك تاقىرىپتارمەن ۇشتاسادى.
