اتامۇرا باسپاسىنان قازاقستاننىڭ حالىق ءارتىسى، بەلگىلى تەاتر جانە كينو رەجيسسەرى، جازۋشى تالعات تەمەنوۆتىڭ «ماحاببات بەكەتى» اتتى جاڭا كىتابى جارىق كوردى. الماتىداعى قازاقستان رەسپۋبليكاسىنىڭ ۇلتتىق كىتاپحاناسىندا وتكەن تۇساۋكەسەر راسىمىنە زيالى قاۋىم وكىلدەرى، بەلگىلى قالامگەرلەر مەن مادەنيەت قايراتكەرلەرى قاتىستى.
ادەبي باسقوسۋدى قوعام قايراتكەرى، «اتامۇرا» كورپوراسياسى» ج ش س پرەزيدەنتى راقىمعالي ابرار ۇلى جۇرگىزدى. جيىنعا قانسەيىت ابدەز ۇلى، جازۋشى سماعۇل ەلۋبايەۆ، قالامگەر كادىربەك سەگىزباي ۇلى، اقىن ۇلىقبەك ەسداۋلەت، اقىن ءارى قوعام قايراتكەرى قازىبەك يسا جانە باسقا دا تانىمال تۇلعالار قاتىسىپ، اۆتوردىڭ شىعارماشىلىق جولى مەن جاڭا جيناعى جونىندە پىكىر ءبىلدىردى.
كەزدەسۋدە كينو، ادەبيەت جانە مادەنيەت توڭىرەگىندە اڭگىمە ءوربىپ، تالعات تەمەنوۆتىڭ ونەردەگى وزىندىك قولتاڭباسى ءسوز بولدى. تەاتر مەن كينو سالاسىندا كورەرمەننىڭ ىقىلاسىنا بولەنگەن رەجيسسەردىڭ ادەبي شىعارماشىلىعى دا وقىرمانعا وي سالىپ، ادام جانىنىڭ تەرەڭ قاتپارلارىن تانۋعا مۇمكىندىك بەرەدى.
«ماحاببات بەكەتى» جيناعىنا «گۇلناز»، «كوكتەم شىقسا، كوكەك كەلەر» پوۆەستەرى جانە «ليبەرتي»، «پاپاسىنىڭ قىزى»، «كوكە بالا» اتتى اڭگىمەلەرى ەنگەن. اۆتور تۋىندىلارىندا ادام تاعدىرى، ماحاببات پەن ساعىنىش، سەزىم تازالىعى جانە ءومىردىڭ سان ءتۇرلى سىناعى كوركەم بەينەلەنەدى.
تالعات تەمەنوۆتىڭ شىعارماشىلىعىنا ءتان ەرەكشەلىك – ادام بولمىسىن، ونىڭ ىشكى قايشىلىعى مەن سەزىم الەمىن نانىمدى سۋرەتتەۋ. كينو ارقىلى كورەرمەنگە جول تاپقان ماحاببات تاقىرىبى جاڭا جيناقتا كوركەم سوزبەن ءورىلىپ، وقىرمانعا باسقا قىرىنان ۇسىنىلىپ وتىر.
كىتاپتىڭ تۇساۋكەسەرى بارىسىندا قالامگەردىڭ شىعارماشىلىعىنا جوعارى باعا بەرىلىپ، جاڭا تۋىندىنىڭ وقىرمانعا بەرەرى مول ەكەنى اتاپ ءوتىلدى. «ماحاببات بەكەتى» وقىرماندى جۇرەك قالاۋى، ادامدىق قارىم-قاتىناس پەن ءومىردىڭ ءمانى تۋرالى تولعاندىراتىن شىعارما رەتىندە ادەبي ورتاعا جول تارتتى.
جاڭا كىتاپتىڭ جارىق كورۋى تالعات تەمەنوۆتىڭ شىعارماشىلىق مۇراسىن كەڭىنەن تانىتۋعا جانە وقىرماننىڭ كوركەم ادەبيەتكە دەگەن قىزىعۋشىلىعىن ارتتىرۋعا ۇلەس قوسادى دەگەن سەنىم بار.
