الماتى قالاسىنىڭ المالى اۋداندىق سوتىندا سانجار بوقايەۆ، ونىڭ جيەنى ماديار قالمەنوۆ جانە جەكە موبيلوگرافى ۇلان ءنۇسىپقوجاعا قاتىستى قىلمىستىق ءىس بويىنشا كەزەكتى سوت وتىرىسى باستالدى. سوتتالۋشىلارعا الاياقتىق جاساۋ، قىلمىستىق جولمەن الىنعان كىرىستەردى زاڭداستىرۋ، ۇرلىق، اعاشتاردى زاڭسىز كەسۋ جانە كورىنەۋ جالعان اقپارات تاراتۋ بويىنشا ايىپتار تاعىلعان.

سوتتا كۋاگەرلەردەن جاۋاپ الۋ جالعاسىپ جاتىر. اتاپ ايتقاندا، «قازترانسگاز» كاسىپوداعىنىڭ 42 ميلليون تەڭگەدەن استام قاراجاتىن جىمقىرۋعا قاتىستى قارجىلىق ەپيزودتار قارالۋدا.

بۇعان دەيىنگى سوت وتىرىستارىندا بوقايەۆتىڭاۆتوكەرۋەن ۇيىمداستىرۋداعى، مەردىگەرلەردى تاڭداۋداعى جانە بولىنگەن قارجىنى باسقارۋداعى ونىڭ رولىنە قاتىستى ءبىرقاتار دەرەك ايتىلدى.

«قازترانسگاز» اق-نىڭ بۇرىنعى باس ديرەكتورى رۋستام سۇلەيمانوۆتىڭ ايتۋىنشا، بوقايەۆ كومپانيادا ءوز بەتىنشە ارەكەت ەتكەن. ول باسشىلىقپەن كەلىسپەستەن ءوز بەتىنشە شەشىم قابىلداپ، اۆتوكەرۋەندى ۇيىمداستىرۋ جۇمىستارىنا جەكە ءوزى جەتەكشىلىك ەتكەن. ال بوقايەۆتى باس ديرەكتوردىڭ كەڭەسشىسى قىزمەتىنە قايرات شارىپبايەۆتىڭ ءوزى تاعايىنداعان. سۇلەيمانوۆتىڭ سوتتا بەرگەن جاۋابىنا قاراعاندا، كومپانيا باسشىلىعى اۋىسقاننان كەيىن دە بوقايەۆ بۇرىنعى ارتىقشىلىقتارىن ساقتاپ قالعان. ول ءىس جۇزىندە قالىپتاسقان قىزمەتتىك باعىنىستىلىق تارتىبىنەن تىس ارەكەت ەتىپ، اتقارىپ جۇرگەن جۇمىسىنىڭ ەگجەي-تەگجەيىن جاڭا باسشىلىققا بايانداۋدى قاجەت دەپ ساناماعان كورىنەدى.

كومپانيانىڭ باسپا ءسوز قىزمەتىنىڭ بۇرىنعى باسشىسى بەكسۇلتان قۇرمانقۇلدىڭ ايتۋىنشا، بوقايەۆ مەردىگەرلەردى ءوزى الىپ كەلىپ، الدىن الا دايىندالعان شىعىن سمەتالارىن ۇسىنعان. ال كاسىپوداق كوميتەتى وتىرىسىنىڭ حاتتاماسىنا ماسەلەلەر ءىس جۇزىندە تالقىلانباستان، تەك فورمالدى تۇردە قول قويىلعان.

تاعى ءبىر كۋاگەر، «MLS-Group» ءجشس-نىڭ بۇرىنعى ديرەكتورى جارمۇحامەد سۇلتانوۆ تۇسىرىلمەگەن دەرەكتى فيلم ءۇشىن بوقايەۆقا 12،3 ميلليون تەڭگەنى قولما-قول بەرگەنىن مالىمدەدى. ونىڭ سوزىنشە، جارنامالىق قىزمەتتەر ءۇشىن تۇسكەن قاراجاتتىڭ ءبىر بولىگى بوقايەۆتىڭ جيھاز كاسىبىن دامىتۋعا جۇمسالعان.

بۇعان دەيىن كاسىپوداقتىڭ بۇرىنعى ءتورايىمى زاۋرەش ماحانوۆا دا مەردىگەر كومپانيالاردى بوقايەۆتىڭ ءوزى ۇسىنعانىن ايتقان بولاتىن. ونىڭ مالىمدەۋىنشە، بوقايەۆتىڭ جيەنى كەلىسىمشارتتاردى الدىن الا ازىرلەپ، ءتيىستى سومالارىن كورسەتىپ، قول قويۋعا دايىن كۇيىندە اكەلىپ وتىرعان.