اباي وبلىسىندا مادەنيەت، تىلدەردى دامىتۋ جانە ارحيۆ ءىسى سالالارىندا ءبىرقاتار جۇمىستار اتقارىلۋدا. جىل باسىنان بەرى وڭىردە 4 954 مادەني ءىس-شارا وتكىزىلدى. بۇل تۋرالى وڭىرلىك كوممۋنيكاسيالار قىزمەتىنىڭ كوشپەلى باسپا ءسوز ءماسليحاتىندا اباي وبلىسىنىڭ مادەنيەت، تىلدەردى دامىتۋ جانە ارحيۆ ءىسى باسقارماسىنىڭ باسشىسى جانجىگىت ومارحان باياندادى.
بۇگىندە وبلىستا مادەنيەت، تىلدەردى دامىتۋ جانە ارحيۆ ءىسى سالاسىندا 299 نىسان جۇمىس ىستەيدى. ونىڭ ىشىندە 137 كىتاپحانا، 132 كلۋب پەن مادەنيەت ءۇيى، 10 مۋزەي جانە 9 ارحيۆ بار.
مادەنيەت ۇيلەرى مەن كلۋبتاردا وتكىزىلگەن ءىس-شارالارعا 386 مىڭنان استام ادام قاتىستى. سونىمەن قاتار 468 ۇيىرمەگە 6 993 ادام قاتىسادى، «حالىقتىق» اتاعى بار 59 شىعارماشىلىق ۇجىم جۇمىس ىستەيدى.
– اباي اتىنداعى تەاتردىڭ ءۇش شىعارماشىلىق ترۋپپاسىندا 103 ءارتىس ەڭبەك ەتەدى. بيىل قازاق مۋزىكالىق-دراما ترۋپپاسى 8 جاس اكتەرمەن تولىقتى. تەاتردا 195 سپەكتاكل كورسەتىلىپ، ولاردى 46 مىڭنان استام كورەرمەن تاماشالادى، – دەدى جانجىگىت ومارحان.
امىرە قاشاۋبايەۆ اتىنداعى مەملەكەتتىك فيلارمونيادا 111 كونسەرت وتكىزىلىپ، 21 مىڭنان استام كورەرمەن قامتىلدى. «اباي ەلى – ونەر كەنىشى» وبلىستىق بايقاۋىنا 10 اۋداننان 2 مىڭعا جۋىق ونەرپاز قاتىستى. ال «الاكول الاۋلارى – 2026» فەستيۆالىنىڭ كونسەرتتىك باعدارلامالارىن 75 مىڭ كورەرمەن تاماشالادى.
مۋزەيلەردىڭ قورىندا 178 مىڭنان استام قۇندىلىق ساقتاۋلى، ونىڭ 43 مىڭنان استامى سيفرلاندىرىلعان. مۋزەيلەردە 851 ءىس-شارا وتكىزىلىپ، 76 مىڭنان استام كەلۋشى قابىلداندى. سونىمەن قاتار 13 جاڭا ەكسپوزيسيا جاسالىپ، 111 كورمە ۇيىمداستىرىلدى.
– نيەۆزوروۆتار وتباسى اتىنداعى بەينەلەۋ ونەرى مۋزەيى مەن ف.م. دوستويەۆسكييدىڭ ادەبي-مەموريالدىق مۋزەيىندە جوندەۋ جۇمىستارى قولعا الىندى. سونىمەن بىرگە دوستويەۆسكيي مۋزەيىنىڭ 55 جىلدىعىنا ارنالعان حالىقارالىق عىلىمي جانە مادەني ءىس-شارالار وتكىزىلدى، – دەدى باسقارما باسشىسى.
كىتاپحانا قورىندا 2 ميلليوننان استام كىتاپ بار، ونىڭ 927 مىڭنان استامى مەملەكەتتىك تىلدەگى ادەبيەتتەر. كىتاپحانالاردا 4 621 ءىس-شارا وتكىزىلىپ، وعان 130 مىڭنان استام ادام قاتىستى. تۇراقتى وقىرماندار سانى 123 مىڭنان استى.
«قازاقستان حالقىنا» قوعامدىق قورىنىڭ قولداۋىمەن «Jana Klub» جوباسى اياسىندا 30 اۋىلدىق كىتاپحانانى جاڭعىرتۋ جوسپارلانعان. ءبىرىنشى كەزەڭگە 15 كىتاپحانا ەنگىزىلىپ، العاشقى جاڭارتىلعان كىتاپحانا اباي اۋدانىنىڭ قاراۋىل اۋىلىندا اشىلدى.
– ءبىزدىڭ ماقساتىمىز اۋىل كىتاپحاناسىن بالالار مەن جاستار ءبىلىم الاتىن، شىعارماشىلىقپەن اينالىساتىن، سيفرلىق مۇمكىندىكتەردى پايدالاناتىن جانە تۇرعىندار باس قوساتىن زاماناۋي قوعامدىق كەڭىستىككە اينالدىرۋ، – دەدى جانجىگىت ومارحان.
مەملەكەتتىك ءتىلدى دامىتۋ باعىتىندا 167 ءتۇسىندىرۋ جۇمىسى جۇرگىزىلىپ، 1 755 نىسان قامتىلدى. 140-تان استام زاڭ بۇزۋشىلىق انىقتالىپ، ونىڭ 91ء-ى تالاپقا ساي رەتكە كەلتىرىلدى. مەملەكەتتىك ورگانداردىڭ شىعىس قۇجات اينالىمىنداعى مەملەكەتتىك ءتىلدىڭ ۇلەسى 97،2 پايىزدى قۇرادى.
اعىمداعى وقۋ جىلىنىڭ ءبىرىنشى كەزەڭىندە 1 211 تىڭداۋشى قازاق، اعىلشىن، ورىس جانە تاتار تىلدەرى بويىنشا كۋرستارعا قاتىسىپ، ونىڭ 748ء-ى قازاق ءتىلىن وقىدى. قىسقا مەرزىمدى تىلدىك كلۋبتاردا تاعى 181 ادام ءبىلىم الىپ، 386 تىڭداۋشىعا سەرتيفيكات بەرىلدى.
ارحيۆ سالاسىندا 9 مەملەكەتتىك ارحيۆ جۇمىس ىستەيدى. ەسەپتى كەزەڭدە ارحيۆ قورى 2 969 ساقتاۋ بىرلىگىنە تولىقتىرىلىپ، 1 629 ساقتاۋ بىرلىگى سيفرلاندىرىلدى. سيفرلانعان قۇجاتتاردىڭ جالپى كولەمى 16 045 ساقتاۋ بىرلىگىنە جەتتى.
وڭىردە مەملەكەتتىك تىزىلىمگە ەنگىزىلگەن 416 تاريح جانە مادەنيەت ەسكەرتكىشى بار. ونىڭ 13ء-ى رەسپۋبليكالىق ماڭىزى بار. نيەۆزوروۆتار وتباسى اتىنداعى مۋزەيدىڭ تاريحي عيماراتىندا ەكى جىلدىق رەستاۆراسيا باستالدى، ال ۆ.گ. چەرنىشيەۆسكيي اتىنداعى №1 مەكتەپ عيماراتىنداعى جۇمىستار اياقتالدى.
مادەنيەت ينفراقۇرىلىمى دا جاڭارتىلۋدا. بەسقاراعاي اۋدانىنداعى بەگەن، ەرنازار جانە گلۋحوۆكا اۋىلدارىندا ءۇش مادەني نىسان سالىنىپ جاتىر. بيىل ءۇرجار اۋدانىنىڭ جوعارعى ەگىنسۋ جانە اقسۋات اۋدانىنىڭ كوكجىرا اۋىلدارىندا 100 ورىندىق ەكى اۋىلدىق كلۋب پايدالانۋعا بەرىلدى.
