قونايەۆ قالاسىنىڭ ونەرى حالىقارالىق ارەنادا بيىكتەن كورىندى. بەلارۋس رەسپۋبليكاسىنىڭ ۆيتەبسك قالاسىندا 14–20 شىلدە ارالىعىندا وتكەن «سلاۆيان بازارى – ۆيتەبسك-2026» حالىقارالىق ەسترادالىق ءان ورىنداۋشىلار بايقاۋىندا قونايەۆ قالالىق مادەنيەت ءۇيىنىڭ ءانشىسى اقەركە اماليات ءى ورىنعا يە بولدى.

وسى ايتۋلى جەڭىسكە وراي قونايەۆ قالاسىنىڭ اكىمى اسحات بەردىحانوۆ ونەرپازدى ارنايى قابىلداپ، العىس حات پەن 1 ميلليون تەڭگەنىڭ سەرتيفيكاتىن تابىستادى.

«„سلاۆيان بازارى“ – الەمدىك دەڭگەيدەگى بەدەلدى ونەر بايقاۋلارىنىڭ ءبىرى. بيىل 19 مەملەكەتتىڭ تالانتتارى ب ا ق سىناعان دودادا ءسىزدىڭ جەڭىسكە جەتۋىڭىز – تەك جەكە جەتىستىك ەمەس، بۇل قونايەۆ قالاسىنىڭ مادەني الەۋەتىنىڭ، قازاق ونەرىنىڭ بيىك دەڭگەيىن الەمگە تانىتقان ۇلكەن جەڭىس. بارشا قالا تۇرعىندارىنىڭ اتىنان سىزگە العىسىمدى بىلدىرەمىن. الار اسۋىڭىز بيىك، ونەر جولىڭىز ءاردايىم جارقىن بولسىن! سىزگە زور دەنساۋلىق، سارقىلماس شابىت جانە جاڭا جەڭىستەر تىلەيمىن!» – دەدى شاھار باسشىسى.

سالتاناتتى كەزدەسۋدە ءانشىنى قولداعان دەمەۋشى، قونايەۆ قالالىق قوعامدىق كەڭەسىنىڭ ءتوراعاسى سەرگەي گوريانوي دا قۇتتىقتاپ، ىزگى تىلەگىن جەتكىزدى.

ءوز كەزەگىندە اقەركەنىڭ اناسى گۇلنۇر زۇلقارشىن قىزى قىزىنىڭ جەتىستىگىنە قۋانىپ، قولداۋ كورسەتكەن قونايەۆ جۇرتشىلىعىنا العىسىن ءبىلدىردى. كەزدەسۋ سوڭىندا ول قالا اكىمىنە ءوزىنىڭ ءتول تۋىندىسىن تارتۋ ەتىپ، ريزاشىلىعىن جەتكىزدى.