قوعام بەلسەندىسى ابزال دوستيار ءوزىنىڭ الەۋمەتتىك جەلىدەگى رەسمي پاراقشاسىندا قىزىلوردا قالاسىنداعى جازاسىن وتەۋ مەكەمەسىندە وتىرعان جۋرناليست دۋمان مۇحامەتكارىمنىڭ قازىرگى جاعدايىنا بايلانىستى ماڭىزدى اقپاراتپەن ءبولىستى.
بۇعان دەيىن جۋرناليست دۋمان مۇحامەتكارىم ءوزىنىڭ زاڭدى قۇقىقتارىن تالاپ ەتىپ، قىزىلورداداعى مەكەمەدەن الماتى وبلىسى اۋماعىنداعى جازاسىن وتەۋ مەكەمەسىنە اۋىستىرۋدى سۇراعان بولاتىن. قولدانىستاعى زاڭناماعا سايكەس، سوتتالعان ازاماتتىڭ جازاسىن ءوزىنىڭ نەمەسە جاقىندارىنىڭ تۇرعىلىقتى جەرىنە جاقىن اۋماقتا وتەۋگە تولىق قۇقىعى بار. الايدا، بۇل تالاپتىڭ ۋاقىتىلى ورىندالماۋىنا بايلانىستى جۋرناليست ءوزىنىڭ دەنساۋلىعىنا زيان كەلتىرەتىن توتەنشە ارەكەتتەرگە (دەنەسىنە زاقىم كەلتىرۋ، اشتىق جاريالاۋ) بارۋعا ءماجبۇر بولعان ەدى. ونىڭ وسى مازمۇنداعى اشىق حاتىن بۇدان بۇرىن قوعام بەلسەندىسى ابزال دوستيار ءوز پاراقشاسىندا جاريالاعان بولاتىن.
«مەن مۇحامەدكارىم دۋمان الماس ۇلى. قىزىلورداداعى 60-شى مەكەمە كارسەرىندە وتىرعانىما 1 جىل 8 اي بولدى.
19.12.2024ء-شى جىلدان بەرى 8 شارشى مەتر قاپاستان شىققان ەمەسپىن.15.07.2026 جىلى، سارسەنبى كۇنى، ساعات 11:25-تە ەكى ۋىس، 11:45-تە تاعى ءبىر ۋىس دارىلەر ءىشىپ الدىم.
ءدارىنى قاپاستاعى كامەرا الدىندا كورسەتىپ ءىشتىم. اۋرۋحاناعا اپارىپ 15:30-دا ءىشىمدى جۋدى. ءبىراق تىركەمەدى.
20.07.2026 جىلى (دۇيسەنبى) ساعات 17:00-دە 6 (التى) تۇيمەدەي باتارەيا، وتتىق، ت.ب. زاتتار جۇتتىم.
وتادان امان قالسام، بۇدان دا زورعى ارەكەتتەرگە بارامىن.
تالابىم: زاڭعا سايكەس الماتى تۇرمەسىنە اپارسىن!»
بۇل دۋمان مۇحامەدكارىمنىڭ تۇرمەدەن جازعان حاتى. (اقپارات Abzal Dostiyar-دىڭ پاراقشاسىنان الىندى.) اتالعان حاتتان كەيىن قوعام بەلسەندىلەرى مەن دۋماندى قولداۋشى توپ، سونىڭ ىشىندە ابزال دوستيار جانە قويشىبەك مۇباراك جاعدايدى ورنىندا تانىسۋ جانە شەشۋ ماقساتىندا ارنايى قىزىلوردا قالاسىنا باردى. ساپار بارىسىندا بەلسەندىلەر مەكەمە اكىمشىلىگىمەن، ءتيىستى قۇقىق قورعاۋ جانە قىلمىستىق-اتقارۋ جۇيەسىنىڭ وكىلدەرىمەن كەزدەسۋلەر وتكىزدى. كەلىسسوزدەر بارىسىندا جۋرناليست دۋمان مۇحامەتكارىمنىڭ تالاپتارىنىڭ زاڭدىلىعى، ونىڭ دەنساۋلىق جاعدايى جانە ونى تۇرعىلىقتى جەرىنە جاقىن مەكەمەگە اۋىستىرۋدىڭ ماڭىزدىلىعى جان-جاقتى تالقىلاندى.
ساپاردىڭ ناتيجەسى مەن الداعى جوسپارلار
جۇرگىزىلگەن جۇمىستار مەن كەڭىنەن كورسەتىلگەن قوعامدىق قولداۋدىڭ ارقاسىندا بۇل ماسەلە وڭ شەشىمىن تاۋىپ جاتىر. ابزال دوستياردىڭ حابارلاۋىنشا، ساپاردىڭ ناتيجەسى وتە جاقسى بولدى. تاياۋ ۋاقىتتا ءجۋرناليستى قىزىلورداداعى مەكەمەدەن الماتى وبلىسىنداعى (زارەچنىي كەنتىندەگى) جازاسىن وتەۋ مەكەمەسىنە اۋىستىرۋ پروسەسى اياقتالادى دەپ كۇتىلۋدە.
قوعام بەلسەندىسى ءوز جازباسىندا دۋماننىڭ دەنساۋلىعى مەن زاڭدى قۇقىقتارىنىڭ ساقتالۋىن نازاردا ۇستاپ، الاڭداۋشىلىق بىلدىرگەن، مورالدىق جانە اقپاراتتىق قولداۋ كورسەتكەن بارشا وقىرمانعا، قوعام وكىلدەرىنە ريزاشىلىعىن ءبىلدىردى.
