حالىقارالىق «ومبى – مايقاپشاعاي» اۆتوموبيل جولىنىڭ بويىنداعى بايبۋرا جىلىتۋ بەكەتىنىڭ اشىلۋ سالتاناتىنا وبلىس اكىمى بەرىك ءۋالي، «قازاۆتوجول» ۇك» اق باسقارما ءتوراعاسى دارحان يماناشيەۆ قاتىستى.

تاۋلى ايماقتا ورنالاسقان بايبۋرا اسۋىندا قاتتى جەل، ۇزاققا سوزىلاتىن بوران مەن قارلى بۇرقاسىن ءجيى كەزدەسەدى. جاڭعىرتىلعان بەكەت وسىنداي جاعدايدا جولدا قالعان جۇرگىزۋشىلەر مەن جولاۋشىلاردى ۋاقىتشا ورنالاستىرۋعا، ارنايى تەحنيكانىڭ جۇمىسىن قامتاماسىز ەتۋگە ارنالعان.

ەرەكشە اتاپ وتەرلىگى، بۇل – رەسپۋبليكا بويىنشا ىسكە قوسىلعان العاشقى جىلىتۋ بەكەتى.

نىساندى جاڭعىرتۋ جۇمىستارى بيىلعى مامىر-قىركۇيەك ايلارى ارالىعىندا جۇرگىزىلدى. مۇندا 20 ادامعا ارنالعان جىلىتۋ جانە دەمالۋ ورنى، اسحانا، سانيتاريالىق توراپتار مەن جۋىنۋ بولمەسى قاراستىرىلعان. سونىمەن قاتار، ەكى تەحنيكاعا ارنالعان جىلى انگار، كولەمى 350 تەكشە مەتر بولاتىن قۇم جانە تايعاققا قارسى ماتەريالدارعا ارنالعان جابىق قويما سالىندى. نىساننىڭ اۋماعىندا تىكۇشاق الاڭى دا بار. بۇل، اسىرەسە، كۇردەلى اۋا رايى جاعدايىندا قۇتقارۋ جانە شۇعىل مەديسينالىق كومەك كورسەتۋ جۇمىستارىن ۇيىمداستىرۋ ءۇشىن ماڭىزدى.

بايبۋرا اسۋىنداعى كۇردەلى تابيعي-كليماتتىق جاعداي قىس مەزگىلىندە كولىك قوزعالىسىنا ايتارلىقتاي اسەر ەتەدى. 2024 جىلعى 16 اقپاندا بولعان بوران كەزىندە وسى اۋماقتا 126 كولىك قار قۇرساۋىندا قالدى. 384 ادامدى قۇتقارۋ جۇمىستارىنا ەكى مي-17 تىكۇشاعى جۇمىلدىرىلعان بولاتىن.

بەكەتتىڭ اشىلۋ سالتاناتىندا قۇتتىقتاۋ ءسوز سويلەگەن ايماق باسشىسى جول قاۋىپسىزدىگىن قامتاماسىز ەتۋدە مۇنداي نىسانداردىڭ ماڭىزى زور ەكەنىن اتاپ ءوتتى.

«مەملەكەت باسشىسى قاسىم-جومارت كەمەل ۇلى توقايەۆ كولىك-لوگيستيكا سالاسىن ستراتەگيالىق باسىمدىقتاردىڭ ءبىرى رەتىندە اتاپ ءوتىپ، اۆتوموبيل جولدارىنىڭ ساپاسى مەن قاۋىپسىزدىگىن قامتاماسىز ەتۋگە ەرەكشە ءمان بەرىپ كەلەدى. پرەزيدەنت اتاپ وتكەندەي، «اۆتوكولىك جولدارى – ەلدىڭ ەكونوميكالىق جانە الەۋمەتتىك تىنىس-تىرشىلىگىنىڭ كۇرە تامىرى». سوندىقتان جولدىڭ ساپاسى مەن قاۋىپسىزدىگى تەك جول جابىنىنىڭ جاعدايىمەن شەكتەلمەيدى. جول بويىنداعى ينفراقۇرىلىمنىڭ، اسىرەسە، توتەنشە جاعداي كەزىندە ازاماتتارعا قاجەتتى كومەك كورسەتۋگە دايىن بولۋىنىڭ ماڭىزى زور. بۇگىنگى جاڭادان سالىنعان بايبۋرا جىلىتۋ بەكەتى – وسى باعىتتاعى ناقتى جۇمىستاردىڭ ناتيجەسى. ءبىز ءۇشىن ەڭ باستى ناتيجە – نىساننىڭ سىرتقى كورىنىسى نەمەسە تەحنيكالىق جابدىقتالۋى عانا ەمەس. ەڭ باستىسى – قيىن جاعدايدا جول بويىندا قالعان ازاماتتىڭ جىلى، ءقاۋىپسىز جەرگە ورنالاسىپ، قاجەتتى كومەك الۋى جانە جاقىندارىنا امان-ەسەن ورالۋى. بۇل – ادام ءومىرى مەن دەنساۋلىعىن قورعاۋعا باعىتتالعان ناقتى جۇمىس. وسى جوبانى ىسكە اسىرۋعا ۇلەس قوسقان كولىك مينيسترلىگىنە، «قازاۆتوجول» مەكەمەسىنە، مەردىگەر ۇيىمداردىڭ قىزمەتكەرلەرىنە، جوبالاۋشىلارعا، تەحنيكالىق جانە اۆتورلىق قاداعالاۋ ماماندارىنا، جول قىزمەتىنە، قۇتقارۋشىلارعا جانە وسى نىساندى سالۋعا اتسالىسقان بارشا ازاماتتارعا وبلىس جۇرتشىلىعى اتىنان العىسىمدى بىلدىرەمىن»، – دەدى بەرىك ءۋالي.

«قازاۆتوجول» ۇك» اق باسقارما ءتوراعاسى دارحان يماناشيەۆ وڭىردە جول ينفراقۇرىلىمىن جاقسارتۋ باعىتىندا اۋقىمدى جۇمىستار اتقارىلىپ جاتقانىن اتاپ ءوتتى.

«ءىرى جول جوبالارىنىڭ كوبى اباي وبلىسىنان باستاۋ الىپ جاتىر. «تالدىقورعان – وسكەمەن»، «قالباتاۋ – مايقاپشاعاي»، «سەمەي – قالباتاۋ» جولدارى قالىپقا كەلتىرىلىپ، سوڭعى جىلدارى جاقسى ناتيجەگە قول جەتكىزدىك. ءقازىر وبلىستاعى رەسپۋبليكالىق ماڭىزى بار جولداردىڭ قاناعاتتانارلىق جاعدايداعى ۇلەسى 80 پايىزعا دەيىن جەتتى. «قازاۆتوجول» ۇلتتىق كومپانياسى ساتىپ العان 1800-دەن استام تەحنيكانىڭ كەمىندە 10 پايىزى اباي وبلىسىنا شوعىرلانعان. الداعى ۋاقىتتا دا وڭىردەگى جولداردىڭ جاعدايىن كەزەڭ-كەزەڭىمەن جاقسارتۋ جۇمىستارى جالعاسا بەرەدى»، – دەدى ول.

شارا بارىسىندا ايماق باسشىسى ارنايى تەحنيكالاردىڭ كىلتىن دە تابىستادى.

جىلىتۋ بەكەتىن جاڭعىرتۋ جۇڭگو حالىق رەسپۋبليكاسى – مايقاپشاعاي – زايسان قالاسىن اينالىپ ءوتۋ – قالباتاۋ – سەمەي – پاۆلودار – رەسەي فەدەراسياسى شەكاراسى باعىتىنداعى KAZ07 رەسپۋبليكالىق ماڭىزى بار اۆتوموبيل جولىندا جۇزەگە اسىرىلدى. جوبا «قالباتاۋ – مايقاپشاعاي» جولىنىڭ 906-1321 شاقىرىمىن رەكونسترۋكسيالاۋدان ۇنەمدەلگەن بيۋدجەت قاراجاتى ەسەبىنەن ىسكە اسىرىلدى.

بايبۋرا اسۋىنداعى 40 شاقىرىم جول دا قايتا جاڭعىرتىلدى. مۇندا 3 كوپىر، 51 سۋ وتكىزۋ قۇبىرى سالىنىپ، 42 665 تەكشە مەتر توسقاۋىل قورشاۋى مەن 425 جول بەلگىسى ورناتىلدى. نەگىزگى قۇرىلىس-مونتاج جۇمىستارى اياقتالىپ، كولىك قوزعالىسى قامتاماسىز ەتىلگەن. قاردان قورعايتىن قورشاۋلار مەن سۋ بۇرۋ ناۋالارىن ورناتۋ جالعاسۋدا.

اباي وبلىسىنداعى اۆتوموبيل جولدارىنىڭ جالپى ۇزىندىعى – 10 044 شاقىرىم. رەسپۋبليكالىق ماڭىزى بار جولداردىڭ 447،5 شاقىرىمىندا جوندەۋ جۇرگىزىلۋدە. 188 شاقىرىمىندا قايتا جاڭعىرتۋ، 259،5 شاقىرىمىندا ورتاشا جوندەۋ جۇمىستارى اتقارىلۋدا. وبلىستىق جانە جەرگىلىكتى جولداردىڭ تاعى 222،6 شاقىرىمى ورتاشا جوندەۋمەن قامتىلعان. جول قاۋىپسىزدىگىن ارتتىرۋ ماقساتىندا 2 500-دەن استام جول بەلگىسى ورناتىلىپ، 4812 شاقىرىم جول تاڭباسى جاڭارتىلدى. سونداي-اق 13 شاقىرىم جانۋارلاردان قورعايتىن قورشاۋ، جاياۋ جۇرگىنشىلەر قورشاۋلارى مەن دوڭگەلەك توسقاۋىلدار ورناتىلدى. وبلىستا 2 865 بەينەكامەرا جۇمىس ىستەيدى.