5 قاراشا 2026 جىل. جاڭاوزەن قالاسى. «بولاشاق» سارايىنىڭ الدى.

جاڭاوزەن قالاسىندا ادامگەرشىلىك، جاۋاپكەرشىلىك پەن جاناشىرلىق يدەيالارىن ۇلىقتايتىن ەرەكشە رۋحاني شارا ءوتتى. قالا تۇرعىندارى مەن زيالى قاۋىم وكىلدەرىنىڭ قاتىسۋىمەن اقىن، فيلوسوف مۇراتحان شوقاننىڭ «جاراتىلىسناما» كىتابىنداعى «كەمەلدەنۋدىڭ جەتى شەڭبەرى» فيلوسوفيالىق تۇجىرىمداماسىنا ارنالعان ەكىنشى سيمۆولدىق ەسكەرتكىشتىڭ سالتاناتتى اشىلۋى بولدى.

بۇعان دەيىن الماتىدا باستاۋ العان جوبا ەندى ماڭعىستاۋ جەرىندە جالعاسىن تاپتى. بۇل باستاما – ادام بولمىسىنىڭ كەمەلدەنۋى مەن قامقورلىق اۋقىمىنىڭ كەڭەيۋىن ناسيحاتتاۋعا باعىتتالعان رۋحاني-تانىمدىق جوبانىڭ ماڭىزدى كەزەڭى.

اشىلۋ سالتاناتىندا جاڭاوزەن قالاسىنىڭ اكىمى سىمبات قۋانىش ۇلى تورەتايەۆ ءسوز سويلەپ، باستامانىڭ قوعامدىق جانە رۋحاني ماڭىزىنا توقتالدى. شارانىڭ ۇيىمداستىرىلۋىنا مادەنيەت جانە تىلدەردى دامىتۋ باسقارماسىنىڭ باسشىسى گۇلجان سالامادين قىزى جۇگەمبايەۆا مەن مۇنايشى مادەنيەت ءۇيىنىڭ ديرەكتورى وركەن نۇراتدين ۇلى تۋەبايەۆ ۇلەس قوستى.

سالتاناتتى جيىنعا ەلىمىزدىڭ جانە شەتەلدەردىڭ قوعام، مادەنيەت قايراتكەرلەرى دە ءۇن قوسىپ، قۇتتىقتاۋ لەبىزدەرىن ءبىلدىردى. اتاپ ايتقاندا، قازاقستان جازۋشىلار وداعى باسقارماسىنىڭ ءتوراعاسى مەرەكە قۇلكەنوۆ، دۇنيەجۇزى قازاقتارى قاۋىمداستىعى ءتوراعاسىنىڭ ءبىرىنشى ورىنباسارى زاۋىتبەك تۇرىسبەكوۆ، حالىقارالىق تۇركسوي ۇيىمىنىڭ باس حاتشىسى سۇلتان رايەۆ، قۇرىلتاي دەپۋتاتتارى جارقىنبەك امانتاي ۇلى مەن ديداربەك دىلدابەك، الماتى قالاسى مادەنيەت باسقارماسىنىڭ باسشىسى دانيار الييەۆ جانە شەتەلدىك قالامگەرلەر ءوز قۇتتىقتاۋلارىندا باستامانىڭ ماڭىزىن اتاپ ءوتتى.

سونداي-اق جاڭاوزەن قالاسىنىڭ قۇرمەتتى ازاماتى، ەڭبەك ارداگەرى مىڭباي ساقي ەڭسەپ ۇلى اق باتاسىن بەرىپ، ىزگى تىلەگىن جەتكىزدى.

قامقورلىقتىڭ جەتى ساتىسى

«كەمەلدەنۋدىڭ جەتى شەڭبەرى» ۇعىمىنىڭ استارىندا ادام ومىرىنە قاتىستى تەرەڭ فيلوسوفيالىق پايىم جاتىر. تۇجىرىمداما ادامنىڭ جاۋاپكەرشىلىگى مەن جاناشىرلىعى بىرتىندەپ كەڭەيىپ، جەكە بولمىستان تۇتاس جاراتىلىسقا دەيىن ۇلاساتىنىن كورسەتەدى.

العاشقى شەڭبەر – وتباسى. ودان كەيىن ادامنىڭ قامقورلىعى جاقىن ورتاسىن، قوعامدى، ۇلتتى، ادامزاتتى جانە بۇكىل جاراتىلىستى قامتيدى. بۇل – ادامنىڭ رۋحاني وسۋىمەن بىرگە ونىڭ وزگەلەر الدىنداعى جاۋاپكەرشىلىگى دە ارتا تۇسەتىنىن بىلدىرەتىن يدەيا.

باسقاشا ايتقاندا، كەمەلدەنۋ – تەك جەكە جەتىستىككە جەتۋ ەمەس. ول وزگەنىڭ تاعدىرىنا بەيجاي قاراماۋ، قوعام يگىلىگىنە ۇلەس قوسۋ، ۇلتتىق قۇندىلىقتاردى قۇرمەتتەۋ، ادامزاتقا جانە تابيعاتقا جاناشىرلىق تانىتۋ ارقىلى كورىنىس تابادى.

وسى تۇرعىدان العاندا، «بولاشاق» سارايىنىڭ الدىندا ورناتىلعان سيمۆولدىق ەسكەرتكىش جاي عانا ساۋلەتتىك نىسان ەمەس. ول – ادامدى ءوز بولمىسىنا ۇڭىلۋگە، ومىردەگى ورنىن باعامداۋعا جانە اينالاسىنا قانشالىقتى پايداسىن تيگىزىپ جۇرگەنىن وي ەلەگىنەن وتكىزۋگە شاقىراتىن فيلوسوفيالىق بەلگى.

كەمەلدىك – جاناشىرلىقتان باستالادى

جاڭاوزەندەگى ەسكەرتكىشتىڭ باستى ەرەكشەلىگى – ونىڭ ماتەريالدىق نىساننان گورى يدەيالىق مازمۇنىنا باسىمدىق بەرىلۋىندە. جەتى شەڭبەر ارقىلى ۇسىنىلعان تۇجىرىمداما وسكەلەڭ ۇرپاققا ىزگىلىك، بىرلىك، جاۋاپكەرشىلىك جانە تابيعاتقا قۇرمەت سەكىلدى قۇندىلىقتاردى تۇسىندىرۋگە باعىتتالعان.

5 قاراشادا وتكەن اشىلۋ ءراسىمى دە وسى مۇراتتاردى كوپشىلىككە تانىستىرىپ، قالا ومىرىندەگى ماڭىزدى مادەني-رۋحاني وقيعاعا اينالدى.

الماتىدان باستالعان باستامانىڭ جاڭاوزەندە جالعاسۋى فيلوسوفيالىق يدەيانىڭ كەڭىنەن تارالۋىنا جول اشتى. ونىڭ تۇپكى ماقساتى – ادامدى تەك ءوز مۇددەسىمەن شەكتەلمەي، وتباسى، قوعام، ۇلت جانە بۇكىل جاراتىلىس الدىنداعى جاۋاپكەرشىلىگىن سەزىنۋگە جەتەلەۋ.

ويتكەنى كەمەلدىككە باستايتىن جول ادامنىڭ وزىنەن، جۇرەگىندەگى مەيىرىم مەن وزگەگە دەگەن جاناشىرلىقتان باستالادى.