الماتى وبلىسىندا ءار اپتا سايىن وتەتىن «تازا قازاقستان» ەكولوگيالىق اكسياسى اياسىندا ەرەكشە كەزدەسۋ ۇيىمداستىرىلدى. وبلىس اكىمى مارات سۇلتانعازييەۆ كوممۋنالدىق قىزمەتكەرلەرمەن بىرگە جاعاجايدى قوقىستان تازارتىپ، كەيىن قاراپايىم جۇمىسشىلارمەن تاڭعى اس ۇستىندە اڭگىمەلەستى.
قونايەۆ قالاسىنىڭ تازالىعىنا جاۋاپتى جۇمىسشىلار ءۇشىن بۇل كۇتپەگەن كەزدەسۋ بولدى. تاڭمەن تالاسا تۇرىپ، كوشە سىپىرۋعا شىعاتىن كوممۋنالدىق قىزمەت ماماندارى ءوڭىر باسشىسىمەن بىرگە تازالىق جۇمىستارىن جۇرگىزدى. ءتىپتى كوكەيدەگى سۇراقتارىن قويىپ، ەركىن پىكىر الماستى.
اكىم ەڭبەك ادامدارىنىڭ كۇندەلىكتى تىرشىلىگىنە، جۇمىس جاعدايىنا، ماماندىقتىڭ قيىندىعىنا جانە تۇرعىنداردىڭ تازالىق مادەنيەتىنە قاتىستى ويىن تىڭدادى. رەسمي جيىندارداعىداي ەمەس، اشىق فورماتتاعى اڭگىمەدە جۇمىسشىلار ءوز ۇسىنىستارى مەن ماسەلەلەرىن بۇكپەسىز جەتكىزدى.
تازالىق جۇمىستارى اياقتالعان سوڭ كەزدەسۋ اق داستارحان باسىندا جالعاستى. تاڭعى اس ۇستىندە اڭگىمە تەك كوممۋنالدىق سالا توڭىرەگىندە وربىگەن جوق. قاتىسۋشىلار ءوڭىردىڭ دامۋى، كوشەلەردىڭ تازالىعى، وتباسى، بالا تاربيەسى، كۇندەلىكتى ءومىر مەن ەڭبەك ادامدارىنىڭ قوعامداعى ورنى تۋرالى دا وي الماستى.
كوممۋنالدىق قىزمەتكەرلەر مۇنداي كەزدەسۋدەن ەرەكشە اسەر العانىن جاسىرمادى. ولار، قاراپايىم جۇمىسشىلارعا كوڭىل ءبولىپ، ۋاقىت تاپقان وبلىس باسشىسىنا ريزاشىلىقتارىن ءبىلدىردى.
كەزدەسۋ سوڭىندا كوممۋنالدىق قىزمەتكەرلەرگە ەستەلىك سىيلىقتار تابىستالىپ، كوشە تازالىعىنا جاۋاپتى جۇمىسشىلارعا اكىم العىس ايتتى.
«ءوڭىردىڭ تازا ءارى جايلى بولۋى – سىزدەردىڭ كۇن سايىن اتقارىپ جۇرگەن جاۋاپتى قىزمەتتەرىڭىزدىڭ ناتيجەسى. “تازا قازاقستان” تۇجىرىمداماسى ەلىمىزدىڭ كونستيتۋسياسىندا بەلگىلەنگەن نەگىزگى قاعيداتتاردىڭ ءبىرى. قورشاعان ورتانى، تۋعان جەرىمىزدى تازا ۇستاۋ بارشامىزدىڭ مىندەتىمىز. وسى ماقساتتا اتقارىپ جۇرگەن ەڭبەكتەرىڭىز ءۇشىن سىزدەرگە شىنايى العىسىمدى بىلدىرەمىن»، – دەدى وبلىس اكىمى.
ايتا كەتەيىك، الماتى وبلىسىندا ءار اپتا سايىن “تازا بەيسەنبى” شاراسى تۇراقتى تۇردە ۇيىمداستىرىلادى. وعان تۇرعىندار، بيزنەس وكىلدەرى، جاستار، قوعام بەلسەندىلەرى مەن مەملەكەتتىك مەكەمە قىزمەتكەرلەرى قاتىسۋدا. ال، ەڭبەك ادامدارىنىڭ قوعامداعى مارتەبەسىن ارتتىرۋ، ەكولوگيالىق مادەنيەتتى نىعايتۋ جانە جەرگىلىكتى بيلىك پەن تۇرعىندار اراسىنداعى اشىق ديالوگتى دامىتۋعا باعىتتالعان بۇگىنگىدەي كەزدەسۋلەر الداعى ۋاقىتتا دا جالعاسىن تاپپاق. بۇل-كوممۋنالدىق سالا قىزمەتكەرلەرىنىڭ ۇسىنىستارى مەن ماسەلەلەرىن تىكەلەي تىڭداپ، ولاردىڭ ەڭبەگىنە قۇرمەت كورسەتۋگە مۇمكىندىك بەرەدى.
