الماتى وبلىسىنداعى Sokol International Circuit اۆتودرومىندا ورتالىق ازيادا العاش رەت ۇيىمداستىرىلعان FIA Central Asia Drifting Cup 2026 دريفت جارىسى ءوتتى. حالىقارالىق دوداعا قازاقستان، قىرعىزستان، موڭعوليا، وزبەكستان جانە رەسەيدەن كەلگەن 20 اۆتوشاباندوز  قاتىستى. بۇل جارىستى قازاقستاننىڭ اۆتوموتوسپورت فەدەراسياسى مەن قىرعىزستاننىڭ اۆتوموتوسپورت جانە جول قاۋىپسىزدىگى فەدەراسياسى بىرلەسىپ ۇيىمداستىردى.

ءۇش كۇنگە سوزىلعان دودادا پيلوتتار بارىن سالدى. جارىس ەرەجەسى بويىنشا اۆتوشاباندوزدار جوعارى جىلدامدىقپەن جۇيىتكىپ كەلىپ،  بۇرىلىستاردى ءدال باعىندىرۋى ءتيىس. الدىمەن ىرىكتەۋ كەزەڭىنەن وتكەن كىل مىقتىلار، كەيىن جۇپتىق باسەكەدە باقسىناستى.
ال، جارىس الاڭىنداعى جانكۇيەرلەر شاباندوزداردىڭ شەبەرلىگىن تاماشالاپ، دوڭگەلەكتەن شىققان كوك ءتۇتىن مەن قۇلاق تۇندىرار كولىك ۇنىنەن كەرەمەت اسەر الدى.  ءتىپتى جينالعان جۇرت دريفت كولىكتەرىن جاقىننان كورىپ، پيلوتتارمەن تىلدەسىپ، قولتاڭبا الدى. ال اۆتودروم اسپانىندا قازاقستان، قىرعىزستان جانە FIA تۋىن ۇستاعان پاراشيۋتشىلەر ونەر كورسەتتى.
حالىقارالىق شارانىڭ اشىلۋ سالتاناتىنا الماتى وبلىسى اكىمىنىڭ ورىنباسارى عاني مايلىبايەۆ قاتىسىپ، اۆتوشاباندوزدارعا ساتتىلىك تىلەدى.  سونداي-اق FIA-نىڭ العاشقى ايماقتىق دريفت كۋبوگىنىڭ قازاقستاندا ءوتۋى ەلىمىز ءۇشىن عانا ەمەس، ورتالىق ازياداعى اۆتوسپورتتىڭ دامۋى ءۇشىن دە ماڭىزدى ەكەنىن اتاپ ءوتتى. 

“اۆتوسپورتتان حالىقارالىق دەڭگەيدەگى جارىستى الماتى وبلىسىندا ۇيىمداستىرۋ –  ءبىز ءۇشىن ۇلكەن جاۋاپكەرشىلىك ءارى جاڭا تاجىريبە. وڭىردە سپورتتىق ينفراقۇرىلىمدى دامىتۋعا، حالىقارالىق جارىستار وتكىزۋگە جانە بۇقارالىق سپورتتى قولداۋعا ەرەكشە ءمان بەرىلەدى. بۇگىنگى دودا – تەك سپورتتىق باسەكە عانا ەمەس. بۇل – ورتالىق ازيا ەلدەرىنىڭ سپورتشىلارىن توعىستىرىپ، تاجىريبە الماسۋعا، كاسىبي شەبەرلىكتى شىڭداۋعا جانە وڭىردەگى اۆتوسپورت مادەنيەتىن دامىتۋعا مۇمكىندىك بەرەتىن ماڭىزدى دودا”،-دەدى عاني مايلىبايەۆ.

ال FIA دريفت كوميسسياسىنىڭ ءتوراعاسى، جاپونيالىق كويچي مۋراتا جارىستى ۇيىمداستىرۋعا اتسالىسقان قازاقستان مەن قىرعىزستاننىڭ اۆتوموتوسپورت فەدەراسيالارىنا، Sokol International Circuit كومانداسىنا جانە ماماندارعا العىس ءبىلدىردى.

جارىستىڭ ەڭ تارتىستى ءساتى فينالدا بولدى. دريفت كەزىندە قازاقستاندىق پيلوت ولەگ حريدوچكين مىنگەن كولىكتىڭ ءرولىنىڭ گيدراۆليكالىق كۇشەيتكىشى (گۋر) ىستەن شىقتى. ەرەجە بويىنشا تورەشىلەر اقاۋدى قالپىنا كەلتىرۋگە بەس مينۋت قانا ۋاقىت بەردى. ءبىراق مەحانيكتەر ونى جوندەپ ۇلگەرگەن جوق. سوعان قاراماستان حريدوچكين جارىس جولىنا شىعىپ، حالىقارالىق دودانىڭ باس جۇلدەسىن جەڭىپ الدى.

كولىگىمنىڭ ءرولى ىستەن شىققان سوڭ، جەڭىسكە جەتەمىن دەگەن وي بولعان جوق. باس جۇلدە قارسىلاسىم ميحايلعا بۇيىراتىنىنا سەنىمدى بولدىم، ونى ءتىپتى جەڭىسىمەن قۇتتىقتاپ قويدىم. ءبىراق تورەشىلەر ەكى جارىستىڭ قورىتىندىسىن ەسكەرە وتىرىپ، ءبىرىنشى ورىندى ماعان بەردى. شىنىمدى ايتسام، قارا كۇشتىڭ ارقاسىندا ۇتتىم»، – دەدى ولەگ حريدوچكين.
وسىلايشا FIA Central Asia Drifting Cup 2026 جارىسىنىڭ باس جۇلدەسىن Nissan 200SX كولىگىن تىزگىندەگەن ولەگ حريدوچكين يەلەندى. ەكىنشى ورىندى Nissan 350Z كولىگىمەن ميحايل پاك، ءۇشىنشى ورىندى Nissan 200SX كولىگىمەن الەكساندر بوچكاريەۆ الدى.

ءۇش جۇلدەگەر دە – قازاقستان پيلوتتارى. جەڭىمپازعا – 6،5 ملن تەڭگە، ەكىنشى ورىن يەگەرىنە – 4،5 ملن تەڭگە، ءۇشىنشى ورىن العان پيلوتقا – 3،5 ملن تەڭگە اقشالاي سىياقى تابىستالدى.

بۇل جارىس ورتالىق ازيا ەلدەرىنىڭ پيلوتتارىنا FIA كۋبوگى اياسىندا ب ا ق سىناۋعا مۇمكىندىك بەردى. ال، جارىس ۇيىمداستىرۋشىلارى، تورەشىلەر مەن تەحنيكالىق ماماندار حالىقارالىق دەڭگەيدەگى دودانى جوعارى دەڭگەيدە وتكىزىپ، مول تاجىريبە جينادى.