استانادا «سەنىمەن بولاشاق» رەسپۋبليكالىق قوعامدىق بىرلەستىگىنىڭ قۇرىلعانىنا بەس جىل تولۋىنا وراي ۇيىمداستىرىلعان «تەكتىلەر تۋ كوتەرەدى» رەسپۋبليكالىق جۋرناليستەر بايقاۋىنىڭ جەڭىمپازدارىن ماراپاتتاۋ ءراسىمى ءوتتى.

سالتاناتتى جيىنعا بىرلەستىكتىڭ قۇرىلتايشىسى، جوبا اۆتورى نۇركەن اسانوۆ، قازاقستان رەسپۋبليكاسى ۇلتتىق عىلىم اكادەمياسىنىڭ اكادەميگى، فيلولوگيا عىلىمدارىنىڭ دوكتورى، پروفەسسور ديحان قامزابەك ۇلى، قوعام قايراتكەرى ورازكۇل اسانعازى قىزى، قازاقستاننىڭ ازاماتتىق اليانسىنىڭ پرەزيدەنتى بانۋ نۇرعازييەۆا، زيالى قاۋىم وكىلدەرى مەن بۇقارالىق اقپارات قۇرالدارىنىڭ قىزمەتكەرلەرى قاتىستى.

جيىندا ءسوز سويلەگەن نۇركەن اسانوۆ قازىرگى كۇردەلى گەوساياسي جاعدايدا قوعامنىڭ بىرلىگى مەن ۇلتتىق قۇندىلىقتاردى ساقتاۋ ماسەلەسىنىڭ وزەكتىلىگىنە توقتالدى. ونىڭ ايتۋىنشا، ەلدىڭ بەيبىت ءومىرى مەن تۇراقتىلىعىن باعالاي وتىرىپ، ازاماتتىق قوعامدى نىعايتۋ، ادامي جانە ۇلتتىق قۇندىلىقتاردى دارىپتەۋ – ورتاق مىندەت.

– «تەكتىلەر تۋ كوتەرەدى» قاعيداسى – ەلدىك مۇددە، ۇلت بولاشاعى مەن ۇرپاق كەلەشەگى جولىنداعى اعارتۋشىلىقتىڭ ۇرانى. قوعامدى ىزگىلىككە، بىرلىككە باستايتىن ازاماتتىق جاۋاپكەرشىلىكتى كۇشەيتۋىمىز قاجەت، – دەدى نۇركەن اسانوۆ.

بايقاۋعا ەلىمىزدىڭ بارلىق وڭىرىنەن 50-گە جۋىق باسپا، ينتەرنەت-باسىلىم، راديو جانە تەلەارنا جۋرناليستەرى قاتىسىپ، ۇلتتىق تاربيە، قوعامدىق سانا، ورتاق جاۋاپكەرشىلىك، رۋحاني مۇرا جانە ازاماتتىق ۇستانىم تاقىرىپتارىنداعى شىعارمالارىن ۇسىندى.

قازىلار القاسىنىڭ شەشىمىمەن ءتورت نەگىزگى نوميناسيا بويىنشا جەڭىمپازدار انىقتالدى. «باسپا باسىلىمىنداعى ۇزدىك ماقالا» اتالىمىندا ەكىباستۇز قالالىق «وتارقا» گازەتىنىڭ باس رەداكتورى جانارگۇل قادىروۆا، «ينتەرنەت-باسىلىمداعى ۇزدىك جاريالانىم» اتالىمىندا Baq.kz اقپارات اگەنتتىگىنىڭ ءتىلشىسى ماقپال جۇماشوۆا، «رەسپۋبليكالىق باسپا باسىلىمىنداعى ۇزدىك ماقالا» نوميناسياسىندا «Egemen Qazaqstan» گازەتىنىڭ ءتىلشىسى ساندىبەك پرەنوۆ، ال «ۇزدىك راديو نەمەسە YouTube باعدارلاماسى» اتالىمىندا «شالقار» ۇلتتىق راديوارناسىنىڭ ءجۋرناليسى گۇلنۇر ومارحان قىزى جەڭىمپاز اتاندى.

ارنايى جۇلدەلەر Qamshy.kz اقپارات اگەنتتىگىنە، پاۆلودار وبلىستىق «Ertis» جانە قىزىلوردا وبلىستىق «Qyzylorda» تەلەارنالارىنا، «مۇنارا» گازەتى مەن KAZ365.kz ينتەرنەت-پورتالىنا، «Jambyl-Taraz»، «Ortalyq Qazaqstan» گازەتتەرىنە، Kazinform حالىقارالىق اقپارات اگەنتتىگىنە، Dauletten.kz سايتىنا، پرەزيدەنت تەلەراديوكەشەنىنىڭ JIBEK JOLY راديوسىنا جانە پاۆلودار وبلىستىق Halyq راديوسىنا تابىستالدى.

«سەنىمەن بولاشاق» رەسپۋبليكالىق قوعامدىق بىرلەستىگىنىڭ ءتوراعاسى گۇلشات سەرىكبەكوۆا بايقاۋدىڭ نەگىزگى ماقساتى قوعام يگىلىگى ءۇشىن ەڭبەك ەتىپ جۇرگەن ازاماتتاردىڭ قىزمەتىن ناسيحاتتاۋ ەكەنىن ايتتى.

– تەكتىلىك – تەك شىققان تەگىنە بايلانىستى ۇعىم ەمەس. ول – ادال ەڭبەك، ەلگە قىزمەت ەتۋ، ازاماتتىق ۇستانىم مەن جاۋاپكەرشىلىك. «تەكتىلەر تۋ كوتەرەدى» باستاماسى قوعامدىق ماسەلەلەردى شەشۋگە اتسالىسۋعا دايىن ازاماتتاردى ورتاق ماقساتقا بىرىكتىرەدى، – دەدى ول.

ءىس-شارا بارىسىندا ءسوز العان قاتىسۋشىلار ۇلتتىق رۋحتى، ازاماتتىق سانانى جانە قوعامدىق جاۋاپكەرشىلىكتى قالىپتاستىرۋدا بۇقارالىق اقپارات قۇرالدارىنىڭ ورنى ايرىقشا ەكەنىن اتاپ ءوتتى. ولار جۋرناليستيكانىڭ قوعامداعى وڭ وزگەرىستەرگە سەرپىن بەرەتىن ماڭىزدى كۇش ەكەنىن ايتىپ، وسىنداي شىعارماشىلىق بايقاۋلار الداعى ۋاقىتتا دا جالعاسىن تاباتىنىن جەتكىزدى.