«Bek Air» әуекомпаниясы ұшағының аппатты жағдайда қонуына қатысты іс ҚР Бас прокуратурасының жіті бақылауында,-деп хабарлайды «Қамшы» порталы ҚазАқпаратқа сілтеме жасап.

«Аталған факт сот алдындағы тергеу амалдарының бірыңғай реестріне ҚР ҚК 344-бабының 1-бөліміне сәйкес тіркелді. Қылмыстық іс Бас көлік прокуратурасының арнайы прокурорларының өндірісіне алынды, сотқа дейінгі тергеу амалдары жүргізіліп жатыр», - дейді ҚР Бас көлік прокуратурасының ресми өкілі Әділет Тоқтамысов.

Айта кетейік, 27 наурыз күні «Bek Air» авиакомпаниясының  «Фоккер-100» типті әуе кемесі « Қызылорда-Астана» бағдарымен рейс орындауы барысында шассидің алдыңғы тіреу тағанының істен шығуына байланысты апаттық жағдайда жерге қонған болатын.

Кесте бойынша ұшақ Астанаға 09.45-те қонуға тиіс болатын. Алайда штаттан тыс жағдайда өрт шығу қаупін мейлінше азайту қажет болды. Осыған байланысты ұшақ әуеде қосымша 50 минуттай уақыт ұшып жүрді. Осы уақыт аралығында Астана әуежайы өрт болу қаупінің алдын алу мақсатында ұшу-қону жолағын көбікке толтырды. Қосымша 7 өрт техникасы мен 4 жедел жәрдем машинасы әзірленді.

Ұшақ 10.36 -да қонды.  Ұшақ бортында 116 жолаушы мен 5 экипаж мүшесі болды. Жапа шеккендер жоқ.

Әуежайдың, қаланың шұғыл қызметтерінің үйлесімді жұмысы мен әуе кемесі экипажының жоғары кәсібилігін атап өткен жөн.

Қазіргі уақытта ҚР ИДМ арнайы комиссиясы құрылды. Зерттеу нәтижесі кейінірек хабарланатын болады.