Ақтөбеде азаматтардың миллиондаған теңгесін қалтаға басқан 2 әйел қоға түсті, - хабарлайды деп Qamshy.kz  Қазақпартқа сілтеме жасап.

Бұл туралы облыстық ІІД баспасөз қызметі ақпарат таратты.

Мәселен, 2 мамыр күні 46 жастағы қала тұрғыны полицияға келіп, 2014 жылдың наурызында таныс әйел 2 млн. 300 мың теңге ақшасын алдап алып кеткендігіне шағым түсірген. Оның айтуынша, күдікті әйел оны мемлекеттік бағдарлама аясында пәтер алуға қол ұшын беретіндігіне сендірген.

«Жедел іздестіру жұмыстары барысында Сазды полиция бөлімшесінің уәкілдері аталған қылмысты жасаған күдіктіні ұстады. Ол 40 жастағы қала тұрғыны болып шықты. Тергеу барысында ұсталған әйел кінәсін мойындады. Бұған қоса, тергеушілер оның дәл осындай басқа да қылмыстарға қатысы бар екендігін дәлелдеді», - делінген хабарламада.  

Сонымен қатар ІІД ақпаратына қарағанда, Сазды полиция бөлімшесінің қызметкерлері қала тұрғынының арызы бойынша тағы бір 42 жастағы әйелді ұстады. Ол да алдау арқылы қала тұрғынының 2 млн. теңгеге жуық қаржысын қалтасына басқан. Тергеушілер оның  осы сипаттағы 4 қылмысқа қатысы барлығын анықтады.

Олардың осыған ұқсас өзге де қылмыстарға қатысы тексерілуде. Бұл фактілер ҚР Қылмыстық кодексінің 190 бабы бойынша сотқа дейінгі тергеудің бірыңғай тізілімінде тіркелген.