ЭКСПО ғажайыптар мекені еді, 
Қызығы бекерден де бекер еді. 
Үш айды үйтіп-бүйтіп өткіздік қой 
Шылқып тұр елдің қазір шекелері.

Әу баста қонақ келмей қала ма деп, 
Уайымдап жоғары жақтың көкелері. 
Ауыл мен аудандардан ел жинатып, 
Мәжбүрлеп талай-талай мекемені.

Барсаң да бармасаң да билет ал деп, 
Мұғалім, дәрігерді төпеледі. 
Негізінде халықты қинамай-ақ 
Ағалар былай етсең не етер еді -

Осы үш айда өтіпті 500 концерт 
Көбісі салт-санаңа бөтен еді. 
Сондағы өнерпаз деп жүргендерің 
Шегірткедей секірген шетел еді.

Кеудесін ашқан әртіс әйелдер мен 
Жыртылған джинсы киген рэпер еді. 
Оларды шақыртпай-ақ айтыс қылсақ 
Экспо тіпті қатып кетер еді.

Сол кезде ешкім қинамай ауылдағы ел, 
Өздері алып ұшып жетер еді. 
Қарапайым халықты мәжбүрлемей, 
Билеттер өз еркімен өтер еді.

ЭКСПО-да бір айтыс болмағаны, 
Ағайын, қынжылтады өте мені. 
Өйткені, бар шетелді таңқалдырар 
Қазақтың осы еді ғой жеке өнері. 
ЭКСПО беделіңді көтергенмен 
Рухыңды ұлттық өнер көтереді.

Жандарбек Бұлғақов