Ауғанстан астанасындағы қонақ үйлердің біріне шабуыл жасалып, нәтижесінде 30-дан адам қаза тапты. Көз жұмған адамдардың арасында бір Қазақстан азаматы мен алты Украина азаматы болған, деп хабарлайды Qamshy.kz ақпарат агенттігі Азаттық радиосының мәліметіне сүйене отырып.

Оқиға орнынан 150 адам қашып құтылған, олардың 41-і шетел азаматтары екен. Бұл жайында Ауғанстан СІМ Наджиб Даниш мәлімдеді. Құтқарылған адамдардың ішінде 10-ы жарақаттанған, ал олардың алтауы қауіпсіздік қызметінің өкілдері.

Наджиб Даништың айтуынша, қаза тапқан 14 шетелдіктің 11-і KamAir әуе компаниясының қызметкерлері болған. KamAir әуе компаниясының басшылығы Кабулдегі қонақ үйге жасалған шабуылдың салдарынан біршама рейстер кейінге қалдырылғандығын мәлімдеді.

Қазақстан СІМ ресми өкілі Әнуар Жайнақов өзінің әлеуметтік желідегі парақшасында қаза тапқан адамдардың арасында бір қазақстандық азаматтың бар екендігін жазды. Аты-жөні көрсетілмеген, 1978 жылғы ер адам екен. «Қазақстан дипломаттары Ауғанстанның қауіпсіздік қызметі мен сыртқы істер министрлігімен байланысып отыр. Жақын арада қаза тапқан ер адамның мәйітін елге жеткізу мәселесі шешіледі», - деп жазады Әнуар Жайнақов.