ҚР мемлекеттік хатшысы Гүлшара Әбдіхалықова президент Нұрсұлтан Назарбаевтың «Жас Отан» жастар қанатының  IV съезіне қатысушыларға арнаған құттықтау сөзін оқып берді, деп жазады Qamshy.kz ақпарат агенттігі.

«Жас Отан» – менің барлық стратегиялық бастамаларым мен саясатымды қолдап келе жатқан, сенімді тірегіме айналған беделді ұйым. Тәуелсіздіктің алғашқы күндерінен бастап жастар мәселесі менің де, мемлекеттің де ең басты назарында болып, бұл салада көптеген бағдарлама жүзеге асырылды. Мен осынау еңбектің жемісі мен қамқорлықтың жылуын жастардың жақсы білетініне кәміл сенемін», — делінген құттықтау хатта. 

Назарбаев ұзақ мерзімді мақсаттарға қол жеткізу үшін әлемдегі қарқынды өзгерістерге дайын болып, заман көшінен қалмау керектігін айтты. 

«Болашаққа бағдар – рухани жаңғыру» мақаламда мен 21 ғасырдағы ұлттық сана туралы және таяу жылдарда қолға алуды қажет ететін міндеттерге ерекше назар аудардым. Солардың қатарында латын әліпбиіне көшу, «Цифрлық Қазақстан» бағдарламасы, үштілді білім беру сияқты міндеттерді елдік мүдденің жаңа деңгейі деп атап өтер едім. «Төртінші өнеркәсіптік революция жағдайындағы дамудың жаңа мүкіндіктері» атты биылғы жолдауымда жаңа заман талаптарына бейімделу мен жетістіктерге жетудің жолдарын қарастырдым», - дей келе өзінің бес әлеуметтік бастамасының жүзеге асуы үшін жастардың біліміне аса назар аудару қажет екенін ескерді.

«Күні кешегі халыққа үндеуімде де өзімнің бес әлеуметтік бастамамды ұсынып, оны жүзеге асырудың тиімді тетіктеріне тоқталдым. Осының барлығында мен жастардың сапалы білім алып, бәсекеге қабілетті маман болып қалыптасуына ерекше көңіл бөліп, соған басымдық бердім. Өйткені сендер еліміздің ертеңі ғана емес, менің бастамаларымды жүзеге асыратын буынсыңдар. Мен сендерді белсенді түрде жан-жақты дамуға, спортпен, өнермен айналысуға, шет тілдерді үйренуге, отандық және әлемдік әдебиеттің терең мұраларын танып білуге, ең бастысы әрқайсыңды өз салаларыңда әлемнің ең озық мамандарымен иық тірестіріп, қатар тұра алатындай деңгейге көтерілуге шақырамын», — деді Елбасы. 

Айта кетсек, Астанада кеше «Жас Отан» жастар қанатының төртінші съезі басталды. Бүгін «ЭКСПО-2017» Конгресс орталығында «Жаңа әлемге жол саламыз» атты гала-форум өтіп жатыр. Оған еліміздің барлық өңірінен келген 1500-ден аса белсенді жасотандық қатысуда.