Бала құқықтары жөніндегі уәкіл Зағипа Бәлиева ОҚО-дағы зорланды деген баланың ісіне қатысты пікір білдірді.

Өз сөзінде Бәлиева журналистер мен қоғамнан бұл мәселені қазбалай бермеулерін өтінді.

«ОҚО-дағы балаға қатысты – мен бұл тақырыпты қайта-қайта қазбалай бермеулеріңізді сұраймын. Қазіргі уақытта тергеу жүріп жатыр. Тараздық жасөспірімге қатысты іс те қаралып жатыр. Ол іске бас прокуратура араласып, іспен танысу үстінде. Іс нәтижелерін өзіміз сіздерге хабарлаймыз», - деді омбудсмен балалардың құқығын қорғау мәселесіне арналған ЮНИСЕФ конференциясының үзілісінде.

Айта кетейік, Оңтүстік Қазақстан облысының жеті жасар тұрғынына байланысты оқиға қоғамдық резонанс тудырған еді. Мектеп оқушысының әжесі немересінің зорланып келгенін айтып, қоғамнан көмек сұраған.

Ал Сарыағаш аудандық білім бөлімі сот-медициналық сараптамасының аталмыш фактіні жоққа шығарғанын айтып ақталды. Алайда сараптама нәтижесіне белсенділер мен еріктілер күмән келтіріп, істің тергелуін талап етті. Тергеу шараларына қазақстандық және шетелдік сарапшылар кірісті. Бала мен әжесі және анасы қазіргі уақытта мемлекет қорғауында.