Санаулы күндерден кейін елімізде Ұлттық біріңғай тестлеу басталады. Биыл Мақтарал ауданында 2807 оқушы аталған сынақтан өткелі отыр. Осыған орай ҰБТ өтетін орында дайындық жұмыстарын күшейтіп, науқанды сәтті ұйымдастыру міндеті тұр. Ол үшін оқушылар мен ата-аналарға барлық жағдай жасалуы тиіс. Бүгін бұл туралы аудан әкімі Жамантай Бейсенбаев аппарат жиналысында мәлім етті.

Ұлттық біріңғай тестлеуге мектеп бітіруші түлектер арнайы көліктермен тасымалданып, 2 мезгіл тамақпен қамтамасыз етіледі. Сынақ өткізу үшін аудандағы №119 мектепте 12 аудитория мен қосымша 2 аудитория дайындалып, түгелдей желдеткіштер орнатылған. Сондай-ақ, ауыз су, әжетхана мәселесі шешіліп, электр жарығымен қаматамасыз ету үшін қосымша трансформатор дайындалған.

"ҰБТ күні 1500-ден астам ата-ана оқушыларға қолдау көрсету үшін келеді. Олардың отыратын орындары мен жүріс-тұрыстарын ұйымдастырып, ауыз сумен, тамақпен қамтамасыз ету  керек. Ол үшін медициналық жедел жәрдем мен өрт сөндіруші көліктерді арнайы бекітіп, кіріп-шыққан көліктерді реттеу үшін ішкі істер басқармасының қызметкерлерін жұмылдыруымыз тиіс. ҰБТ өтетін нысанның тазалығы сақталып, ата-аналар балаларын көріп отыру үшін LED экрандарды орнатуымыз қажет. Сондай-ақ, ҰБТ өтетін орында заңсыз сауданы реттеп, арнайы асханалардың қызметін ұйымдастырғанымыз жөн" - деді Жамантай Қанайұлы.

Жиын барысында ҰБТ күні 30 ұялы телефон сигналын анықтайтын және 2 металл анықтайтын құрылғылар пайдаланылатыны айтылды. Сонымен қатар, оқушылар мен ата-аналардың қауіпсіздігі үшін 22 бейнебақылау камералары іске қосылатын болады.

Айта кетейік, Былтыр 2648 мақтаралдық түлектер ҰБТ-ға қатысып, ауданның орташа көрсеткіші 70,5 балл болған. Ал, биыл 2807 оқушы орташа 81,5 бал жинайды деген болжам бар.