Алматыдағы Балуан Шолақ атындағы спорт сарайында екі ұрының қолынан қаза тапқан мәнерлеп сырғанау шебері Денис Тенмен қоштасу рәсімі өтуде, деп хабарлайды Qamshy.kz ақпарат агенттігі.

Қысқа ғана ғұмырында елінің сүйікті ұлына айнала білген спортшымен қоштасуға келген халықтың қарасы өте көп.

Спорт сарайына адамдар кіріп үлгере алмай жатыр. Елімізге белгілі мәнерлеп сырғанау шеберімен қоштасуға келген қала тұрғындарының бірі: «Бүгін Денис Тенмен қоштасу шарасы болып жатыр. Бірақ спорт сарайының ішіне кіре алмай жатырмыз. Балуан Шолақ спорт сарайының алдында халық өте көп, есікке сыймай жатқан секілді», - дейді.

Спортшыны ақтық сапарға шығарып салуға Алматы қаласы әкімдігі, елімізге белгілі боксшы Геннадий Головкин, саясаттанушы Айдос Сарым және өзге де қоғам қайраткерлері мен беделді тұлғалар келген.