Ресейдің Ауғанстан астанасы Кабул қаласындағы елшілігінің баспасөз атташесі Никита Ищенко "Вконтакте"-дегі парақшасында "Талибан" қозғалысының бұрынғы өкілдерімен түскен суретін жариялады деп хабарлайды Qamshy.kz ақпарат агенттігі Бизнес Online басылымына сілтеме жасап.

"Талибан" қозғалысы Ресей аумағында тыйым салынған террористік ұйым. Кеуделеріне "Георгий ленталарын" таққан ауғандықтармен түскен суретінің астына елшілік қызметкері "талибандықтар & георгий ленталары" деген жазба да қалдырған. Бұл жазба ресейлік БАҚ-тың наразылығын туғызды. Өз жазбасы қызу талқыға түскеннен кейін ғана елшілік өкілі желідегі жазбасына "бұрынғы талибандықтар & георгий ленталары" деген өзгеріс енгізді. Сонымен қатар, Ищенко Ресейлік БАҚ өкілдеріне террорлық ұйымның мүшелігіне кіретін адам Ресей елшілігінің ғимаратына кіре алмайтынын да ескертті.  

Фотосурет Кабулдегі елшіліктің 9 мамыр - Жеңіс күні қарсаңында өткізген ресми қабылдауында түсірілген. Шақырылған қонақтар арасында Ауғанстандағы ең ірі қозғалыстардың бірі болып саналатын "Талибан" қозғалысының бұрынғы өкілдері де болған.

"Талибан" қозғалысы Ресейде ресми түрде террористік және экстремистік ұйым ретінде тіркелген.    

Ұсынған: Дәурен Сыбанбай