Ақтауда Қазақстан Республикасының Ұлттық Ұланының ән-би ансамблі Қазақстан Республикасы  Ішкі істер министрлігінің бастамасымен «Біздің Елбасы» акциясы аясында өнер көрсетті.

Концерттің мақсаты - жастарды Отанға деген сүйіспеншілік пен ұлтжандылыққа тәрбиелеу, әскери өмірдің үздік дәстүрі мен ұрпақтар сабақтастығын дәріптеу.

 Гала-концерттік бағдарламаны ҚР Ұлттық ұланы бас қолбасшысының тәрбие және әлеуметтік-құқықтық жұмыстар жөніндегі орынбасары, генерал-майор Мұхаметқали Сәтов ашты.

-Негізігі мақсат Тұңғыш Президент – Елбасының «Рухани жаңғыру» және «Ұлы даланың жеті қыры» бағдарламалық мақалаларын түсіндіру, азаматтардың Ұлттық ұлан әскери қызметшілеріне, Ұлттық ұлан жауынгерлерінің ерлік әрекеттеріне  және олардың атқаратын қызметтік-жауынгерлік міндеттерін  ел-жұртқа кеңінен ұлағаттап жеткізу,-дейді Мұхаметқали Сәтов.

Шараның концерттік бағдарламасында Мұрат Нұрғазиев, Ғайни Жұмашева, Бауыржан Тұрғұмбаев сынды елімізге еңбек сіңірген өнер қайраткерлері мен Қазақстан эстрадасының жұлдыздары, халықаралық байқаулардың лауреаттары өнер көрсетті.

Ұлттық ұлан ән-би ансамблінің бастығы әрі көркемдік жетекшісі капитан Дархан Рахымғалиевтің жетекшілігімен ұрпақтар сабақтастығы мен патриотизм рухын сіңірген әскери, классикалық, халық және ұлттық әндер шырқалды. Сондай-ақ, келген қонақтарға  қазіргі заманғы эстрада әндері, әлем халықтарының билері ұсынылды

Шара соңында  Маңғыстау облысы әкімінің орынбасары  Руслан Сәкеев, облыс әкімінің атынан  шығармашылық ұжымға алғыс хат пен ықылас гүлін тарту етті.