22 мамырда Швейцарияның Лозанна қаласында  Халықаралық Олимпиада комитетінің (ары қарай ХОК) кезекті отырысы өтті деп жазады Qamshy.kz ақпарат агенттігі. 

Аталған отырыста талқыланған мәселелердің бірі - бокс спортының Олимпиада ойындарында қалу немесе қалмауы. Естеріңізде болса, осыдан 6 ай бұрын ХОК 2020 жылы Токиода өтетін Олимпиада ойындарына бокстан іріктеуді тоқтата тұру туралы шешім қабылдаған еді. ХОК сол кезден бастап Бүкіл әлемдік бокс федерациясының (ары қарай AIBA) жұмысын тергеумен айналысқан. Олар  тексерісті АIBА-ның қаржы, менеджмент, этика және төрешілік саласындағы қызметіне байланысты жүргізді.

22 мамырда арнайы зерттеу жүргізген комиссия зерттеу нәтижелерін ұсынды және ХОК-тың атқару комитеті Олимпиада ойындарының бағдарламасында бокстың қала беретінін мәлімдеді. Алайда ХОК АІВА-ны тергеуді тек Токиодағы ойындар аяқталғанға дейін ғана тоқтатайын деп отыр. 

Енді 2020 жылғы Олимпиада ойындарының іріктеу жүйесі мен Токиодағы бокс жарыстарын АІВА емес, ХОК мүшесі, Халықаралық гимнастика федерациясының президенті Моринари Ватанабенің жетекшілігімен Халықаралық Олимпиада Комитетінің арнайы құрылған жұмыс тобы басқарады.

Сонымен қатар, ХОК Токиода ерлер сегіз, әйелдер бес салмақ дәрежесінде жарысқа қатысатынын да мәлімдеді. Естеріңізге сала кетейік, 2016 жылы Риода өткен Олимпиада ойындарында ерлер 10, әйелдер 3 салмақ дәрежесінде сынға түскен еді. 

Дайындаған: Мият Кәшібай