Қазақстандық кәсіпқой боксшы Данияр Елеусінов (7-0, 3 КО) чилилік боксшы Луис Норамбуэнаны (3-2-1, 0 КО) жеңді деп хабарлайды Qamshy.kz ақпарат агенттігі. 

Жартылай орта салмақта (66,678 кг) жұдырықтасатын қос боксшының арасындағы жекпе-жек АҚШ-тың Оксон-Хилле (Мэриленд штаты) елдімекенінде 26 мамырда өтті. 6 раундқа жоспарланған жекпе-жекте Данияр Елеусінов төрешілердің шешімімен жеңді.

Бұл – Елеусіновтың кәсіқой бокстағы жетінші жеңісі. Ол бұған дейін өткізген 6 жекпе-жегінде де қарсыластарынан басым болған. 

Айта кетейк, чилилік боксшы Данияр Елеусіновке жекпе-жекке бір күн қалғанда ғана қарсылас атанды. Оған дейін Елеусіновтың промоутерлері Данияр кәсіпқой карьерасындағы жетінші жекпе-жегінде мексикалық боксшы Мигель Замудиоға (43-12-1, 27 КО) қарсы жұдырықтасады деген ақпарат берген. Алайда Мэриленда штатының атлетикалық комиссиясы мексикалық боксшыға жекпе-жекке шығуға рұқсат етпеді. Сонымен қатар бұған дейін Данияр Елеусіновтың 8 маусымда өзінің отандасы Генадий Головкин мен канадалық боксшы Стив Роллс арасында өтетін бокс кешінде мексикалық боксшы Фернандо Каркамоға (23-9, 18 КО) қарсы жұдырықтасатыны да айтылған. Бірақ Қазақстан намысын қорғап жүрген қос боксшы  бір бокс кешінде жұдырықтаса алмайтын болды. Себеп - Головкин мен Елеусіновтың промоутерінің келісе алмауы. 

Естеріңізге сала кетейік, бұл жекпе-жек 28 жастағы Елеусіновтың АҚШ-тағы төртінші кездесуі. Сонымен қатар ол Ұлыбританияда екі рет рингке шықса, бір рет Монакода жекпе-жек өткізген. 2016 жылы Риода өткен Олимпиада ойындарында алтын медаль алған Елеусінов 2018 жылдың  сәуірінен бастап кәсіпқой бокста жұдырықтасып жүр.  

Қазір Данияр Елеусінов кәсіпқой боксшылардың рейтингін жариялап отыратын Boxrec.com сайтының тізімінде жартылай орта салмақтағы 1769 боксшының арасында 169 орында келе жатыр. Елеусіновтен бөлек, дәл осы салмақта қазақстандық боксшылар Нұрсұлтан Жаңабаев (81 орын), Бобыржан Момынов (118 орын), Бахтияр Еюбов (164 орын) бар. Бұл салмақтың көшін америкалық боксшы Теренс Кроуфорд бастап тұр. Сондай-ақ, үздік ондықтың ішінде Мэнни Пакьяо (Филипин), Дэнни Гарсия (АҚШ), Кит Турман (АҚШ), Амир Хан (Ұлыбритания) сынды атақты боксшылар да бар.

Дайындаған: Мият Кәшібай