2020 жылы республикалық маңызы бар жолдардың 1089 шақырымы қалпына келтіріледі. Былтыр бұл көрсеткіш 1101 шақырым болған, деп хабарлады индустрия және инфрақұрылымдық даму министрлігі.

Жолдардың 546 шақырымы ресайклинг әдісімен жөнделсе, кедірлі-бұдырлы беттік өңдеумен жолдардың 287 шақырымы қамтылады. Асфальт-бетон жабындысы жолдардың 172 шақырымында жаңартылып, 85 шақырым жол микросюрфейсинг технологиясымен жөнделеді.

Биыл жөнделетін жолдардың біразы Қарағанды облысына тиесілі. Мұнда «Қызылорда – Павлодар – Успенка  – РФ шекарасы», «Қызылорда – Павлодар», «Жайрем – Қаражал – Атасу», «Жезқазған – Петропавл», «Ақшатау – Ағадыр – Ортау», «Қызылорда – Павлодар», «Нұр-Сұлтан – Қабанбай батыр – Энтузиаст – Киевка – Теміртау» және «Қарағанды – Аягөз – Тарбағатай – Бұғаз» жолдары жөнделеді деп жоспарланған. Орташа жөндеуден өтетін жолдардың жалпы ұзындығы – 279 шақырым.

Орташа жөндеу жұмыстары жүргізілетін жолдардың ұзақтығы бойынша екінші орында Қостанай облысы тұр. Өңірде биыл жолдардың 110 шақырымы жөнделеді. Атап айтқанда, «Денисовка – Жітіқара – Мықтыкөл – РФ шекарасы», «Мамлютка – Қостанай», «РФ шекарасы (Екатеринбург) – Алматы» жолдары жөндеуден өтеді.

Ақмола облысында жолдардың 107 шақырымы жаңартылады. Жөндеу жұмыстары «Көкшетау – Атбасар», «Нұр-Сұлтан – Петропавл», «Көкшетау – Кішкенекөл – Бидайық – РФ шекарасы (Омбы), «Бурабай курорттық аймағына апаратын жол», «Көкшетау бұрма жолы» және «Нұр-Сұлтан – Ерейментау – Шідерті» жолдарында жүргізіледі.

Қазақстандағы республикалық маңызы бар жолдардың жалпы ұзындығы 24888 шақырымды құрайды.