Баршамызға мәлім, өткен жылдың 11 қарашасы күні Президент Нұрсұлтан Әбішұлы Назарбаев өзінің Қазақстан халқына дәстүрлі Жолдауын ұсынды. Жалпы, Мемлекет басшысының Жолдауы әрбір жылы ерекше өзіндік сипаттарымен есте қалады.

Сол секілді аталмыш құжаттың да ерек­шеліктері мол. Кез келген істі, шаруаны жоспарсыз, жүйесіз жүзеге асыруға болмайтындығы секілді биылғы Жолдау да ел келешегін айқындаушы, ұзақ мерзімді «Қазақстан – 2050: Қалыптасқан мемлекеттің жаңа саяси бағыты» страте­гиясының құрамдас бөлігі, оның қалай жүзеге асырылып жатқандығын айқын­даушы, таяудағы міндеттерді нұсқайтын нұрлы жолы. Жолдаудың аты да осы идея­мен үндес – «Нұрлы жол – болашаққа бастар жол». Мемлекет басшысы өз Жол­дауының басында бүгінгі күнгі ха­лықаралық ахуал мен әлемдік саяси аре­нада болып жатқан жайттарға шолу жасай келіп, әлемдік экономиканың әлі де жа­һандық қаржы-экономикалық дағдарыс салдарынан айыға алмай отыр­ғанын, ал кейбір жерлерде әлі құлдырау жалғасуда екенін, геосаяси дағдарыс пен жетекші державалардың санкциялық саясаты әлемдік экономиканы қалпына келтіруде қосымша кедергілер туындатып жатқан­дығына баса назар аударды. 
Елбасымыз таяудағы жылдар жаһан­дық сынақтардың уақыты болады, әлемнің бүкіл архитектурасы өзгереді және барлық елдер осы күрделі кезеңнен лайықты өте алмайтынын, бұл шептен тек мықты мем­ле­кеттер, жұдырықтай жұмылған халықтар ғана өтетін болатынын басып айтты.     Президент өз сөзінде Қазақстанның ке­зін­де сыртқы нарықтағы жағдайы оңтайлы болып, мұнай мен біздің экспорттық өнімдерімізге баға айтарлықтай жоғары деңгейде болған жылдары шикізат экспор­тынан түскен табыстарды Ұлттық қорға бағыттаудың дұрыс шара екенін еске салды. Шындығында да, біздің халық «Бес күндігін ойламаған ерден без» дейді. Сол кезде ертеңгі күнді ойлап, қор жинап, ал бүгін осы қорды халық пен ел игілігіне жаратудың уақыты жеткендігіне және осы қорды дұрыс бөлудің маңызына тоқталды.
Н.Назарбаев басталған жобаларды аяқтау және аса өткір мәселелерді шешу үшін Үкіметке Ұлттық қордан 500 мил­лиард теңге көлеміндегі екінші транш қаржысын бағыттауға тапсырма берді, ал ол қаржының қандай мақсатқа жұмсала­тындығы Жолдауда айқын айтылған.
Бұл құжатта басты назар еліміздегі жол құрылысына аударылған.
Нұрсұлтан Әбішұлы халық арасындағы «Елдің өркенін білгің келсе, жолына қара» деген қағиданы мысалға келтіре отырып, жолдардың шын мәнінде, өмірдің өзегі, бай­-қуатты тірліктің қайнар көзі екен­дігіне ерекше тоқталып, «Барлық аймақтар те­мір ­жолмен, тас жолмен, әуе жолымен өзара тығыз байланысуы керек. Астанада тоғысқан тоғыз жолдың торабы елорданың жасампаздық рухын тарататын өмір-та­мырға айналуы тиіс...» дей келе, аймақ­тардың өзара байланысын жақсарту елдің ішкі әлеуетін арттыратындығын атап өтті. Шағын және орта бизнес пен іскерлік белсенділікті қолдау бойынша жұмысты жалғастыруды, сондай-ақ ірі кәсіпкерлікті жеңілдікпен несиелеуге қосымша 100 миллиард теңге бөлу жос­парланып, тамақ және химия өнер­кәсібіндегі, машина жасаудағы, сондай-ақ, қызмет көрсетулер саласындағы жо­баларды жүзеге асыруды қамтамасыз ету көзделіп отырғанын тілге тиек етіп кетті.
Сондай-ақ индустриялық инфрақұры­лымдарды дамыту мақсатында құрылыс материалдарына, көліктік-коммуника­циялық, энергетикалық және тұрғын үй-коммуналдық салалар үшін өнімдер мен қызмет көрсетулерге үлкен сұраныс туды­рады, осы орайда шағын және орта кәсіп­керлікті қолдап, көмек көрсету мақса­тында Тұтынушылардың құқықтарын қорғау комитетіне қарасты «Ұлттық сараптама орталығының» зертханалық сараптама мамандары жоғарыда айтылған сөздерді қуаттап, халықтың санитарлық-эпидемиологиялық хал-ахуалын жақсарту мақсатында түрлі күрделі зертханалық сараптамалар жүргізуге әрқашанда дайын екенін айта аламыз.
Мемлекет басшысының сөзімен айт­қанда: «Нұрлы жол» жаңа экономикалық саясат – әлемнің ең дамыған 30 елінің қата­рына кіру жолындағы біздің ауқымды қадамымыз» болмақ. Президентіміз өзінің осы бір маңызды құжатында барша қазақстандықтардың алдында үлкен де жауапты жұмыстар тұрғандығын айта келіп, жаhандық сыннан өту үшін біздің топтаса білуіміз қажеттігіне баса назар ау­дарады. Жолдауда тұрақтылық пен келісім, бейбітшілік идеяларына, жастардың біздің болашағымыздың тірегі екендігіне ерекше көңіл бөлініп, «Нұрлы жолдың» осы ба­ғыт­тағы маңызы да айқындала түседі.
Жолдауда Президент: «Жалпыұлттық идеямыз – Мәңгілік елді басты бағдар етіп, тәуелсіздігіміздің даму даңғылын «Нұрлы жолға» айналдырдық. Мәңгілік ел – елдің біріктіруші күші, ешқашан тау­сылмас қуат көзі. Ол «Қазақстан – 2050» стра­тегиясының ғана емес, ХХI ғасырдағы Қазақстан мемлекетінің мызғымас идея­лық тұғыры!
Жаңа қазақстандық патриотизм деге­німіздің өзі – Мәңгілік ел! Ол – барша Қазақстан қоғамының осындай ұлы құн­дылығы. Отанды сүю – бабалардан мирас болған ұлы мұраны қадірлеу, оны көздің қарашығындай сақтау, өз үлесіңді қосып, дамыту және кейінгі ұрпаққа аманат етіп табыстау.
«Барлық қазақстандықтардың жұ­мысының түпкі мәні – осы!» дейді.
Біз де өз тарапымыздан осы айтылған сөздерді қолдап, қуаттап, ұлы жолдағы сапарымыз сәтті, болашағымыз жарқын болып, баршаңызға «Нұрлы жолды» жү­зеге асырудағы істеріңізге табыс тілегіміз келеді.
Шалғынбай Жандосов, 
Ұлттық экономика министрлігі Тұтынушылардың құқықтарын қорғау комитеті «Ұлттық сараптама орталығы» республикалық мемлекеттік кәсіпорнының Ақтөбе облысы бойынша филиалының директоры, медицина ғылымдарының кандидаты