Индустрия және инфрақұрылымдық даму министрлігі зейнетақы жинақтарын пайдалануға қатысты сұрақтарға жауап берді. 

Сондай-ақ зейнетақы қорындағы шекті сомадан асатын ақшаны пайдалану мерзімі неліктен 45 күннен 20 күнге дейін қысқартылғанын түсіндірді.

Министрліктің мәлімдеуінше, аталған мерзімді қысқарту туралы ұсыныс жаңа ережелерді Ұлттық банкпен келісу барысында айтылған.  

Оған зейнетақы төлемдерін қайтару және алу жағдайлары негіз болған.

"Мақсатты пайдалану мерзімі ұзақ болса (45 жұмыс күні), БЖЗҚ-дағы зейнетақы жинақтары қалдығы өзгергенде инвестициялық кіріс есептелмей қалуы мүмкін.  

Сондай-ақ бұл ай сайынғы зейнетақыны есептеу кезінде қаражаттың дұрыс есептелмеуіне әкеп соқтырады. 

Ал 20 жұмыс күні зейнетақы жүйесі салымшыларының мүдделерін қорғауға мүмкіндік береді" делінген министрлік хабарламасында.