Мемлекет басшысы Қасым-Жомарт Тоқаев Әлихан Смайыловты Қазақстанның премьер-министрі қызметіне тағайындады. Жарлық Ақорда сайтында жарияланды.

"Әлихан Асханұлы Смайылов Қазақстан Республикасының премьер-министрі лауазымына тағайындалсын" делінген жарлықта.

Бұған дейін Мәжіліс отырысында Қасым-Жомарт Тоқаев премьер-министр кандидатурасына Әлихан Смайыловты ұсынған болатын. 89 депутат кандидатураны қолдап, дауыс берді. Нәтижесінде депутаттар президенттің ұсынысын мақұлдады. 

Еске сала кетейік, 5 қаңтарда президент үкіметті отставкаға жіберіп, министрлер кабинетін басқару уақытша Әлихан Смайыловқа өткен.

Әлихан Асханұлы Смайылов 1972 жылы дүниеге келген. 1994 жылы Әл-Фараби атындағы Қазақ мемлекеттік ұлттық университетін "қолданбалы математика" мамандығы бойынша тәмамдаған. 1996 жылы ҚР Президенті жанындағы Қазақстан менеджмент, экономика және болжамдау институтының мемлекеттік басқару магистрі дәрежесін алған.

Еңбек жолы:

1993-1995 жж. – «А-Инвест» инвестициялық-жекешелендіру қорының бас маманы.

1995-1996 жж. – Ұлттық статистика агенттігінің басқарма бастығының орынбасары, басқарма бастығы.

1996 ж. – Қазақстан Республикасы президенті жанындағы жоғары экономикалық кеңесте тәлімгер.

1996 жылдың тамызы – 1998 жылдың наурызы – Ұлттық статистика агенттігінің басқарма бастығының орынбасары, басқарма бастығы.

1998 жылдың наурыз-сәуірі – статистикалық жоспарлау және реформалар агенттігінің статистика және талдау комитеті төрағасының орынбасары.

1998-1999 жж. – Қазақстан Республикасы Президент әкімшілігінде бас сарапшы, сектор меңгерушісі, мемлекеттік инспектор 

1999 жылдың тамыз-қарашасы – Қазақстан Республикасы Президент әкімшілігінде ұйымдастырушылық-қадағалау бөлімінің мемлекеттік инспекторы 

1999 жылдың қарашасы – 2003 жылдың ақпаны – Қазақстан Республикасының статиститка агенттігінің төрағасы.

2003 ж. – Қазақстан Республикасы сыртқы істер вице-министрі.

2003-2006 жж. – «Экспорттық кредиттер мен инвестицияларды сақтандыру жөніндегі мемлекеттік сақтандыру компаниясы» АҚ басқармасының төрағасы.

2006 жылдың ақпаны – 2007 жылдың қаңтары – Қазақстан Республикасы қаржы вице-министрі.

2007 жылдың қаңтары – 2008 жылдың қарашасы – «Қазагро» Ұлттық холдинг» АҚ президенті.

2008 жылдың 21 қарашасы – 2009 жылдың 27 қазаны – Қазақстан Республикасы қаржы вице-министрі.

2009 жылдың 27 қазаны – 2014 жылдың 13 тамызы – Қазақстан Республикасының статистика агенттігі төрағасы.

2014 жылдың 13 тамызы – 2015 жылдың 11 желтоқсаны – ҚР Ұлттық экономика министрлігінің статистика комитеті төрағасы.

2015 жылдың 11 желтоқсаны – 2018 жылдың 18 қыркүйегі – Қазақстан Республикасы Президентінің көмекшісі.

2018 жылдың 18 қыркүйегі – 2019 жылдың 25 ақпаны – Қазақстан Республикасы қаржы министрі.

2019 жылдың 25 ақпанынан – Премьер-министрдің бірінші орынбасары – қаржы министрі.

2020 жылдың 18 мамырынан бастап – Қазақстан Респбуликасы Премьер-министрінің бірінші орынбасары.