Алматы қаласының әкімі Бақытжан Сағынтаев қызметінен кетіп, оның орнына Ерболат Досаев тағайындалды. Ақпаратты президенттің баспасөз хатшысы Берік Уәли ресми түрде растады.
"Мемлекет басшысының Жарлығымен Бақытжан Әбдірұлы Сағынтаев Алматы қаласының әкімі лауазымынан басқа жұмысқа ауысуына байланысты босатылды; Мемлекет басшысының Жарлығымен Ерболат Асқарбекұлы Досаев Алматы қаласының Әкімі қызметіне тағайындалды. Ол Қазақстан Республикасы Ұлттық Банкінің Төрағасы лауазымынан босатылды" делінген ақпараттық хабарламада.
Бақытжан Сағынтаев әлеуметтік желіде қызметтен кетуіне байланысты жазба жариялап, өзінің тұсында атқарылған, басталған істер туралы қысқа айтып өтті.
"Бүгін мен өз лауазымымды жаңа әкімге тапсырамын. Осыдан тура 720 күн бұрын президент маған Алматы әкімдігін басқаруды сеніп тапсырды. Бұл үшін мемлекет басшысына ризамын.
Мен сіздермен үнемі бірге болдым. Қала өмірін жақсартуға бар күш-жігерімді арнадым. Ұзақ мерзімді "Алматы-2050" стратегиясын қабылдап, қаланы дамытудың келешегін айқындадық. Президенттің "Шетсіз қала" қағидаты негізінде қалаға қосылған аудандардың түйткілді мәселелерін шешуге баса назар аударып, "Жаңа Алматы" кешенді бағдарламасын қабылдадық.
Біз әлеуметтік мәселелерді шешу үшін Алматыны агломерация ретінде дамыту және облыстың қаламен шектесетін 4 ауданында жұмыс орындарын құру жұмысын күн тәртібіне қойдық. Денсаулық сақтау жүйесі нығайтылды. Бір жылдың ішінде ең заманауи жабдықтармен жабдықталған 3 жұқпалы аурулар ауруханасын іске қостық. Пандемия кезінде денсаулық сақтау жүйесіндегі дағдарысқа жол берілмеді.
Мектептерді жедел салу бағдарламасын қолға алдық. Тек 2021 жылы 33 жаңа мектеп салынды. Бұл – мектептердегі орын тапшылығын азайтуға бағытталған түбегейлі қадам болды. Экологияны жақсарту үшін жүйелі екі шешім қабылданды: миллион ағаш отырғызу және екінші ЖЭО-ны газға ауыстыру.
Менің әрбір жұмыс күнім сіздердің көз алдыларыңызда өтті. Өздеріңізбен әрдайым кездесіп, ақылдасып отырдық. Апта сайын Akimat Live тікелей эфиріне шықтым. Атқарылған шаралар туралы үнемі хабардар болдыңыздар. Бірге атқарылған жұмыс үшін алматылықтарға алғыс айтамын!
Қаламызға және барша алматылықтарға бақытты ғұмыр тілеймін! Алматы мәңгі менің жүрегімде" делінген Сағынтаев жазбасында.
Түрлі дереккөздер Бақытжан Сағынтаевтың қызметінен кетіп, оның орнына Ерболат Досаев келетіні туралы күні бұрын жазған болатын.
Пікір қалдыру