Жақында Қазақ мемлекеттік қыздар педагогикалық университетінде ҚР Білім және ғылым министрі Аслан Сәрінжіповтің қатысуымен Арулар ордасында бой көтерген үш бірдей нысан – 9 қабатты жатақхана, «Аққу» атты жүзу бассейні және «Ақ шатыр» жазғы ойын-сауық алаңының ресми тұсаукесер рәсімі өтті. Бұл туралы "Қамшы" порталы Айқын-ақпаратқа сілтеме жасай отырып хабарлайды.

Үш бірдей нысанның лентасын қиған ҚР Білім және ғылым министрі Аслан Бәкенұлы мен ҚазМемҚызПУ ректоры Динар Жүсіпәліқызы, сондай-ақ сыйлы қонақтар әрбір ғимараттың ішкі жаб­дықталуымен танысып, ризашылық­та­рын білдірді. Студенттердің дастарқа­нынан дәм татқан министр шәкірттермен тілдесіп, оқу-білім жайында сыр шертті.
«Ақ шатыр» жазғы алаңында құттық­тау сөз сөйлеген А.Бәкенұлы: «Қазіргі таңда Қазақстанда жастар үшін барлық жағдай жасалып отыр. Жыл сайын мем­лекет 150 мың оқу грантын бөледі. Келесі жылдан бастап грантпен оқитын студент­тердің стипендиясы 25 пайызға өседі. Тех­никалық мамандықты игеріп, өнді­рісте жұмыс істеймін деген жастар үшін индустрия­ландыру бағдарламасы бо­йынша жаңа жұмыс орындары, ғылыммен айналысамын деген шәкірттер үшін зерт­ханалық орындар ашылып жатыр. Осы оқу орнында оқитын студенттер ұстаздық жолды таңдаған. Өздеріңіз білесіздер, мұғалімнің рөлі өте мәртебелі. Универ­ситетті бітіріп, мектепке баратын студент­терге жақсы жаңалық бар. Елбасының шешімімен келесі жылдан бастап мұға­лімдердің жалақысы 30-50 пайызға өсетін болады. Сондықтан жастар үшін барлық жағдай жасалып отыр. Тек қана жақсы оқып, еңбек етуіміз керек. Осындай кере­мет ғимараттар ашыла берсін. Қазақ­станымыз өркендей берсін!» – деген жүрекжарды тілегін айтты.
450 орынға арналған жаңа жатақхана Елбасының тапсырмасына орай студент­терді жатақханамен қамтуға бағытталған «Студенттік баспана» мемлекеттік бағдар­ламасының аясында салынды. Заман талаптарына сай салынған жатақхана жаңа жиһаздармен толық жабдықталған, инфра­құрылымдық мүмкіндігі де жоғары. Бірінші қабатында қыздарға арналған медици­налық орталық орналасқан. Сонымен қатар қыз­дардың сән салоны, жаттығуға арналған фитнес залы, ком­пьютер, демалыс бөлмелері жұмыс істей­ді. Әр қа­батта кір жуатын бөлмелер, ке­рек-жарақ­тармен жабдықталған асүйлер бар. За­ма­науи телекоммуникация­лық желі, Wi-Fi сымсыз желілері тартылған. Бір сөзбен айт­қанда, жаңа студенттер үйінде бой­жеткендердің бос уақытты ұтымды өткі­зулеріне барлық жағдай ойластырылған. Қыздар университетінде еліміздің барлық алыс аймақтарынан келетін студент-қыздардың көп келіп оқитынын ескерсек, бұл мемлекеттің ұлт тәрбиешілеріне деген қамқорлығы екені анық. 
Мәселен, жүзу бассейні жастардың денсаулығын жақсарту мақсатын көз­дейтін «Саламатты Қазақстан» бағдар­ламасы аясында бой көтерді. Себебі еліміз үшін дені сау, рухы таза ұрпақ өсіріп тәрбиелеу ең маңызды да негізгі мәселе. Елбасы Н.Ә.Назарбаев «Қазақ­стан – 2050» страте­гиясы – қалыптасқан мем­лекеттің жаңа саяси бағыты» Жол­дауында «Салауатты өмір салтын қа­лыптастыру – ұлт денсау­лығының кілті болып табылады. Біз ба­лаларымыздың денсаулығын қамтама­сыз етуге жаңа тәсілдер енгізу мәселесімен жұмыс жүр­гізуіміз қажет, жастар денсаулы­ғына мән беруіміз керек» деген болатын. Осы орай­да, пайдалануға берілетін жүзу бас­сейні спортпен айналысуға, дені сау ұрпақ қалыптастыруға, жастардың са­лауатты өмір салтын ұстануына өз ықпалын тигізері сөзсіз.
Үшінші нысан – «Ақ шатыр» жазғы ойын-сауық алаңы. Бұл елордада орна­ласқан «Хан Шатыры» іспетті салынған. Кең де әсем әрі ұлттық нақышта тұрғы­зылған алаңның ішкі сәулеті қазақ үй сияқты әспеттеліп, төбесіндегі шаңы­раққа айнала уықтар қойылған. 
Салтанатты рәсімнен кейін Аслан Бәкенұлы, Абай атындағы Қазақ ұлттық педагогикалық университетінің ректоры Серік Пірәлиев пен Алматы қалалық Жас­тар саясаты мәселесі жөніндегі бас­қар­маның басшысы міндетін атқарушы Нұрлан Сыдықов бастаған қонақтар Қыз­дар университеті өнерпаздарының салта­натты концертін тамашалады.