Ресейдің қаржыландыруы қысқартылғаннан кейін Қазақстанның жүздеген азаматы Байқоңырда жұмыстарынан айырылды.  Бұл туралы "Қамшы" порталы  Қазақстан жаңалықтары қызыметіне  сілтеме жасай отырып хабарлайды.

“Байқоңыр қаласы әкімшілігі басшысының қаулысымен қаржыландырудың қысқартылуына байланысты “Роскосмос” ұйымынан және қаланың бюджеттік ұйымдарынан ағымдағы жылы 600 астам адам жұмыстан босатылды, келесі жылы шамамен 1500 адамды қысқарту жоспарлануда. Негізінен (3/4 жуық) бұл Қазақстан азаматтары”, — деп хабарланған  әкімдіктің баспасөз қызыметінде.

Өңір билігінің мәліметінше, жұмыссыз қалған Байқоңыр тұрғындарын жұмысқа орналастыру мәселесін селекторлық отырыста Қызылорда облысы әкімі Қырымбек Көшербаев көтерді, сондай-ақ аталмыш мәселе Қазақстан үкіметінде селекторлық отырыс барысында талқыланды.

Жалпы, ғарыш айлағын жалға алу уақытында ресейлік тарап қаланы дамытуға қаражат бөлмеген. Бұдан басқа, 2008 жылы салынған перзентхана әлі күнге дейін түрлі сылтаулармен ресейлік тараптың  қабылдануында болмаған. Соған байланысты өңір басшысы Байқоңыр қаласы нысандарын жалдаудан шығаруды ұсынған.