Búginde qazaq eli Naýryz meıramy sekildi, jańaryp, túrlenip keledi. Búkil ǵalamda kún men tún teńelse, al Qazaqstan bolashaqqa jańa qadammen, senimdi attanyp barady. Eger biz shynymenen álemdegi básekege qabiletti 50 eldiń qataryna kirgimiz kelse jáne olardyń birshamasynan ozǵymyz kelse onda biz ózara aýyzbirlikti saqtap qana qoımaı, osy maqsatqa jetý úshin bir atanyń balasyndaı jumys isteýimiz kerek. *** Tarıhy tereńde jatqan Naýryz merekesi qazaq jerinde árqashan toılanǵan, alaıda, bir zamandarda halqymyz ony joǵaltyp aldy. Elimiz táýelsizdik alǵannan keıin tól merekemizdi biz qaıtadan jańǵyrttyq. Bul mereke árýaqytta halqymyzda irgesi sógilmegen birliktiń, eńseli erliktiń, yrys pen baq-berekeniń merekesi bolyp sanalatyn. Qystan, qıynnan shyqqan halqymyz bir-birimen qaýyshyp, tós túıistirip, aǵaıynnyń amanshylyǵyn bilip, ótkenge salaýat aıtyp, keleshekten baqyt tilep, Naýryz kóje ishetin bolǵan. Bul kúni urysqan aǵaıyn tabysatyn, renjisip qalǵan jastar qaıtadan tabysyp, mahabbattaryn arttyryp, bas qosatyn, barlyq jamanshylyq umytylatyn, jaqsylyqqa qaraı bet buratyn kez bolǵan. Túbinde bizdiń naǵyz jańa jylymyz osy Naýryz meıramy bolýy qajet. Qytaı óziniń jańa jylyn aqpannyń ortasynda bir apta toılaıdy. Shyǵystyń barlyq halqynyń óz jańa jyldary bar. Biz de túbinde óz merekemizge kelýimiz kerek.