Ál-Farabı atyndaǵy Qazaq ulttyq ýnıversıtetinde mıkrobıolog ǵalym, Qazaqstan Ulttyq jaratylystaný ǵylymdary akademıasynyń akademıgi Jubanova Ajar Ahmetqyzynyń 75 jyldyq mereıtoıyna arnalǵan «Qazirgi bıotehnologıa máseleleri: laboratorıalyq zertteýlerden óndiristerge» atty halyqaralyq ǵylymı-tájirıbelik konferensıa ótti, - dep habarlaıdy «Qamshy» portaly.
İs-sharanyń negizgi maqsaty – laboratorıalyq zertteý nátıjelerin óndiriske engizýdiń ońtaıly joldaryn izdestirý. Konferensıa jumysynda sońǵy on jylda qaterli isik aýrýlarynyń aldyn alýda jáne emdeýde qoldanylatyn bıotehnologıalyq preparattardyń zerthanalyq úlgisiniń synaq merzimin toqtatyp, olardy qoldanysqa engizý máselesi sóz boldy. Profesor N.T. Baltabekovtiń aıtýynsha, statısıka boıynsha búgingi tańda elimizde jylyna 360 myń adam qaterli isik aýrýlaryna shaldyǵady. Eń qaıǵylysy onyń ishinde balalardyń sany 500-den asyp jyǵylady. Jyl saıyn onkologıalyq aýrýǵa shaldyqqandardyń 16 myńy dertine daýa taba almaı, ómirden ótedi eken. Ókinishke qaraı, bul kórsetkish kún sanap artyp keledi.
Atalǵan máseleni joıý men aldyn alý sharalaryn uıymdastyrý, sonymen qatar ósimdikterdiń, janýarlardyń jáne mıkroorganızmderdiń bıotehnologıalyq jáne genetıkalyq potensıaldaryn anyqtaý, veterınarıa jáne aýylsharýashylyǵynda jańa bıotehnologıalyq preparattar daıyndaýdyń tájirıbelik sheshimderin usyný máseleleri konferensıa barysynda keńinen talqylandy.
Sondaı-aq is-shara barysynda álemdi jaılaǵan transgendi azyq-túlik ındýstrıasynyń damyǵan ýaqytynda gendik modıfıkasıalanǵan ónimderden aýlaq bolý jáne gendik ınjenerıany durys baǵytta paıdalaný sıaqty birqatar suraqtarǵa jaýap berildi. «Qazaqstanda gendik ınjenerıanyń kómegimen maqtanyń «Túrkistan» atty sorty otyrǵyzyldy. Bul ádistiń basty artyqshylyǵy ol aram shópterdiń ósýine jol bermeıdi. Nátıjesinde sharýalardyń jumysy jeńildep, ónimniń kólemi artady», – dedi QR BǴM «Ulttyq bıotehnologıa ortalyǵynyń» bas dırektory E.M. Ramanqulov. Iaǵnı, bıotehnologıalardy tıimdi paıdalaný el ekonomıkasyna aıtarlyqtaı oń ózgerister ákeletini sózsiz.
Ál-Farabı atyndaǵy QazUÝ – bıotehnologıa salasy mamandaryn daıarlaıtyn basty bilim ordalarynyń biri. Joǵary oqý ornynda «Bıologıa jáne bıotehnologıa máseleleri» ǵylymı-zertteý ınstıtýty, «Hronobıologıa jáne hronomedısına» oqý-ǵylymı ortalyǵy men «Jańa talap» atty genetıkalyq-selektıvtik ortalyqtyń jumys isteıtinin atap ótý kerek. Oqý ordasynda Ajar Ahmetqyzy sıaqty joǵary bilikti mamandardan bilim alǵan shákirtterdiń erteńgi kúni el ıgiligi úshin qyzmet etetinine senimimiz mol.
