Aktrısa Gúlsharat Jubaevany kópshilik «Kelin» fılmi arqyly biledi. «Kelinde» kelin rólin somdaǵannan keıin azdap kórermenge jaqpaı qalǵany bar.
Biraq Gúlsharat odan keıin de tarbıe men taǵylymǵa toly «Qarashańyraq», «Áke serti», «Siz kimsiz, Ka myrza?» sekildi kınotýyndylarǵa túsken. Sońǵy kezderi ol «Feısbýk» áleýmettik paraqshasynda ózi tikken kıimderin, qolóner buıymdaryn jarnamalaı bastady. Gúlsharattyń qazaqy oıý-órnekpen kómkerilgen dúnıeleri bizdi tańdaı qaqtyrdy. Sosyn «osynyń bárin shynymen ózi tige me?» degen saýal týyndady. Ne de bolsa, bárin ózinen suraıyq dep sheshtik.
– Gúlsharat, áńgimemizdi ózińizdiń týyp-ósken jerińizden bastasaq...
– Men Ózbekstanda, Núkis qalasynda 1985-jyly dúnıege kelgenmin. Otbasynda jeti aǵaıyndymyz – tórt ul, úsh qyz. Taǵdyrdyń jazýy bolar, tórt baýyrymnan da aıyrylyp qaldyq. Qazir úsh qyzbyz. Ózimnen keıin eki sińlim bar. Ákem ómir boıy tarıh pániniń muǵalimi bolyp eńbek etken, qazir zeınette. Al anam – agronom.
Biz 2001-jyly otbasymyzben Atyraýǵa kóship kelgenbiz. Aldymen mýzykalyq ýchılıshede bı óneri boıynsha bilim alǵanmyn. Ekinshi mamandyǵym – zańger. Ata-anam ónerge barýyma azdap qarsylyǵyn bildirip, salmaqtyraq mamandyqty tańda degen soń, zańgerlik sala boıynsha joǵary bilim aldym. Biraq bala kúnimnen ónerge jaqyn bolǵannan keıin men odan alystap kete almadym. Zańgerlik mamandyqpen qansha jerge jumysqa kirgizdi, tipti prokýratýrada da jumys istep kórdim. Biraq kóp uzamaı shyǵyp kettim. Qysqasy, ol sala meniń janyma jaqyn emestigin túsindim. Atyraýda teatrda jumys jasap júrgen kezimde, rejıser Talǵat Temenovten Almatydaǵy Ǵ.Músirepov atyndaǵy jastar teatryna shaqyrtý aldym. Sóıtip 2007-jyly Almatyǵa kelip, ary qaraı ár túrli kastıngterden ótip, fılmderge túsý jumysy bastalyp ketti.
– Sizdiń kıno álemindegi tusaýyńyzdy «Kelin» fılmi kesti me?
– Solaı. Negizi «Kelindi» kórgen árbir kórermende maǵan degen birtúrli kózqaras qalyptasqan. Óıtkeni qazaqta buryn-sońdy mundaı fılm bolmaǵan ǵoı. Bárine kináli – ónerge ǵashyqtyǵym. Kishkentaıymnan bı bıledim, sportqa qatysyp, taekvandodan qara belbeý ıesi (birinshi dan) atandym, sýretshi de bola jazdadym. Biraq kınoǵa túsý meniń basty armanym edi. Mendegi bir «shans» «Kelin» fılmi boldy. Alǵashynda-aq rejıser maǵan: «Keıipkerińniń jalańashtanatyn jerleri bar», – dedi. Adamǵa anasynan artyq jan joq qoı, anammen aqyldastym. «Qyzym, óziń bil. Ákeńniń ruqsatyn al», – dedi ol kisi. Al ákem: «Qyzym, eger júregiń shyn óner dep soǵyp tursa, betińnen qaqpaıyn. İshiń jalańashtanbasa bolǵany da», – dedi.
– Qazir bir úıdiń tútinin tútetip otyrǵan kelin, aıaýly ana, adal jar ekenińizdi bilemiz. Odan bólek, áleýmettik jeliler arqyly ártúrli qolóner buıymdaryn, qazaqy naqyshtaǵy turmystyq zattardy tigetin ónerińiz bar eken...
– Iá, meniń anam – tiginshi. Óziniń 40 tiginshisi bar kásiporny bolatyn, áli de tigisten qol úzgen joq. İs tigý ónerin kishkentaı kúnimnen anamnyń qasynda júrip úırendim. Qazir meniń ekinshi jumysym – tiginshilik. «Shabyt» dep atalatyn shaǵyn mekememiz bar, onyń quramyna tigin sehy, elý adamnan quralǵan bı ansambli kiredi. Iaǵnı bıshilerimizdiń sahnalyq kıimderin, basqa da syrttan keletin tapsyrystardy tigýmen aınalysamyz. Byltyrǵy jyldyń jetistigi desem de bolady, ózimiz qurylys jumystaryn júrgizip, bı mektebin, úlken tigin sehyn ashtyq. Qazir sol bı mektebimizge kishkentaı balalar qabyldap, olardy tárbıelep jatyrmyz.
– Osy rette ártis bolamyn deıtin ini-sińlilerińizge qandaı keńes berer edińiz? Jalpy, balam ártis bolsa dep júrgen ata-analar aldymen qaıda barýy kerek?
– Rasynda da osy suraqqa jaýap taba almaı júrgen jandar kóp. Men ondaı kisilerge mynany aıtamyn: Balany eshýaqytta shektemeńiz. Sportpen aınalysqysy keldi me, betinen qaqpańyz, úıirmege qatystyryńyz. Bılegisi keldi me, bıshilerden dáris alsyn. Án de aıtsyn. Iaǵnı balaǵa «Sen myna salanyń ǵana mamany bolasyń!» dep talap qoımańyz. Ýaqyt óte kele bala qandaı salany qalaıtynyn ózi sheshedi. Máselen, meni ata-anam eshteńeden shektegen joq. Jańa aıtyp ótkenimdeı, sportpen de aınalystym, at sportynan da habarym bar, bıden dáris aldym, zańgerlikti bitirdim, kıno salasynda eńbek etip jatyrmyn, tiginshiligim taǵy bar. Iaǵnı balanyń boıynda bir emes, birneshe óner bolǵany durys.
– Osynyń bárine qalaı úlgeresiz? Jasyratyny joq, jumysy men úı sharýasyn qatar alyp júre almaıtyn áıelder bar aramyzda. Solarǵa óz qupıańyzben bólisesiz be?
– Men ata-enemmen birge turamyn. Sondyqtan otbasymnyń bereke-birligi, shańyraqtyń tazalyǵy, jaılylyǵy – meniń moınymda. Keshke deıin jumystarmen júrsem de, úıge kelgen soń bar sharýany ózim isteımin. Kúıeýimniń, balalarymnyń erteńgi kúnge kıetin kıimderin daıyndap, úıdiń ishin jınap, tańerteńgi dastarhanǵa qoıatyn táttilerdi pisirip baryp uıyqtaımyn. Jalpy, meniń túsinigimde, áıel degen osyndaı bolýy kerek. Jumys isteımin dep sheshtińiz be, onda bárine úlgerýge mindettisiz.
Jap-jas bolyp aqyl aıtty demessizder, taǵy birer keńes bersem deımin. Otbasy baqyty – áıeldiń qolynda. Bardy uqsatyp jaratsa, joqqa sabyrlyqpen qarasa bári jaqsy bolady. Qandaı jaǵdaı bolmasyn, ashýlanbańyz. Bárine túsinistikpen qarańyz. «Anaý joq, mynaý joq» dep kúıeýińizdiń mıyn ashyta bermeńiz. Sizge degen sezimi sýyp ketýi múmkin.
– Sońǵy suraq bolsyn, túr-symbatyńyzǵa qandaı da bir erekshe kútim jasaısyz ba?
– Dıeta ustamaımyn. Artyq salmaq qospaýymnyń syry – kúndelikti bımen aınalysyp otyramyn. Aıtpaqshy, áıelderge de osyndaı keńes beremin. Kún saıyn bıleńizder, aryqtaýdyń eń qarapaıym tásili – osy. Sán salondaryna da jıi baramyn dep aıta almaımyn. Betime, shashyma úıde, qolda bar zattardy paıdalana otyryp kútim jasaımyn.
– Áńgimeńizge rahmet. Ónerińiz órleı bersin!
Suhbattasqan – A. QASYMBEK, "Zamana"
