BAQ betterinde jıi synǵa ushyraıtyn Mádenıet jáne sport mınıstri Arystanbek Muhamedıulyna qatysty kesheli beri taǵy bir shý shyqty. Kezinde Muhamedıuly rektorlyq jasaǵan Almatydaǵy T. Júrgenov atyndaǵy Óner akademıasynyń túlegi Eńlik Sydyqova mınıstrdi stýdent «qyzdarǵa qyryndap, mádenıetsizdik tanytatyn» dep aıyptady. Máseleniń mán-jaıyn bilmek bolyp Qamshy.kz tilshisi mınıstrdiń ózine telefon shaldy.
Arystanbek Muhamedıuly E. Sydyqovanyń búgingi málimdemesi teginnen-tegin jasalyp otyrmaǵanyn, onyń artynda qarjylyq máselelerge tap bolǵan rejıserlar toby turǵanyn aıtady.
«Fenıks» fılmi tóńireginde daý bolyp jatyr. Reseıden kompanıa ashtyq aqshany sonda aýdaryńdar dedi. Ol kompanıanyń amerıkandyq kınostýdıanyń fılıaly dep aıtty. Teksergende ol kompanıanyń amerıkandyqtarǵa esh qatysy joqtyǵy anyqtaldy. Túsirgen fılmniń de tızerin kórseńizder ózderińiz de baıqaısyzdar, fılmniń sapasy syn kótermeıdi. Ana kıno, myna kınodan qıyp alyp, qosa salǵan. Al, fılmniń búdjeti qyrýar qarjyny qurady. Bir tızeri úshin 6 mıllıon teńge jumsaldy», - degen mınıstr rejıser Talǵat Jánibekovtiń fılm úshin bólingen 100 mıllıon teńgeniń esebin de tolyq ótkizbegenin aıtady.
Mınıstrdiń aıtýynsha, fılmniń tızerine 6 mıllıon teńge, kompúterlik grafıkasyna 14 mıllıon teńge jumsalǵan. Kastıng uıymdastyrý shyǵyny 33 myń AQSH dollaryn quraǵan. Kartına basshylyǵy 30 mıllıon teńgeni ózderiniń eńbekaqysy retinde alǵan kórinedi. Mıllıondaǵan teńge qarajat jalǵan qujattarmen qoldy bop ketken. Osy jaıttarǵa baılanysty mınıstrlik qazir jobanyń shyǵyndaryn, qujattaryn tekserip jatqan kórinedi. Tekseris nátıjesi boıynsha, zańsyz qujattarǵa qol qoıǵan laýazymdy tulǵalar da jaýapqa tartylmaq eken.
Muhamedıulynyń paıymdaýynsha, mınıstrliktiń osy isi jandaryna batqan rejıserlar osyndaı shabýyldarǵa baryp jatqan kórinedi. Al, qyzdarǵa qatysty aıyptaýlardyń taza jala ekenin aıtqan mınıstr rejıserler qoǵamnyń nazaryn ózderine aýdaryp, synaıtyn basqa ilik tappaǵan soń osyndaı áreketterge baryp otyr dep sanaıdy.
«Ana beınemálimdeme jasaǵan qyz ondaı áreketke barmas úshin oılanýy kerek edi. Bul degen jala jabý ǵoı. Eshqandaı dálelsiz qalaı ondaı aıyp taǵady?», - degen A. Muhamedıuly E. Sydyqovanyń ózi-aq artynda kimder turǵanyn ashyp qoıdy dep otyr.
«Meniń bar jazyǵym – kıno salasyndaǵy urlyqty, zańsyzdyqtardy toqtatqanym. Sol qylyǵym úshin osyndaı shabýylǵa ushyrap jatyrmyn. Tuńǵyshbaı aǵamyz da maǵan kiná artyp sóılepti. Men onyń basqaratyn teatr qaıratkerleri odaǵynyń ishki isine aralasyppyn. Ol múmkin emes jaǵdaı ǵoı. Men qalaısha Asanáli Áshimovke sen bylaı iste, Tuńǵyshbaı aǵaǵa qarsy shyq dep qalaı aıta alamyn? Men ádil synnyń bárin qabyldaımyn. Kez-kelgen jýrnalıs tikeleı ózime qońyraý shalyp, kez-kelgen suraq qoıa alady. T. Jánibekov para surady dep málimdedi. Artynsha sotta ol sózinen bas tartty. "Men olaı demedim. Jýrnalıser qosyp jiberipti" dedi. Mundaı bola ma?», - deıdi mınıstr.
