«Qamshy» portaly mal saýdasymen aınalysqan aǵaıyndy úsh jigittiń ólimine qatysty Uzynaǵash aýylynda bolǵan qylmystyq istiń jaıyn jiti baqylap, oqyrmandaryn aqparattandyryp keldi. Bul joly oqyrmandarǵa marqumdardyń artynda qalǵan jesiri men jetimine jurt jasaǵan jaqsylyq týraly jaǵymdy jańalyqty usynamyz.
Almaty oblysy, Uzynaǵash bazaryna mal satýǵa shyǵyp, kisi qolynan qastandyqpen ólgen aǵaıyndy úsh azamattyń otbasylaryna erikti azamattar uıysyp kómek qolyn sozdy. Bul týraly azamattar joǵalǵany týraly aqparat taraǵanda «Uzynaǵash» izdeý tobyna belsene at salysqan Maqsutqan Dáleıuly «Qamshy» tilshisine habarlady. Qylmys ashylǵan soń Maqsutqan Dáleıuly erikti azamattar arasynda aǵalyq kórsetip, «marqumdardyń týystaryna» materıaldyq kómek kórsetý týraly Wechat mıkroblogyndaǵy Ábdirahman Qamanshaıuylynń «Almaty aqparat» tobynda úndeý tastap, bastama kótergen. Bir aýyzdan qoldaý tapqan bastama nátıjesinde, Asyljan Mamysh esimdi azamattyń «Qaıyrymdy jandar» tobynyń esepshoty arqyly úsh aı ishinde 1 mıllıon 157 myń teńge kóleminde qarjy jınalǵan.
2 kún buryn, 19 jeltoqsanda Maqsutqan Dáleıuly Ábdirahman, Jánibek esimdi azamattarmen birge Taldyqorǵanǵa baryp, esepke búginge deıin jınalǵan aqshany alyp marqumdardyń otbasyna tabystady. «Qaıyrymdy jandardan jınalǵan qarajat ár otbasyǵa 386 myń teńgeden úlestirilip berildi, qazaǵa qaıyra kóńil aıtyp, quran baǵyshtap qaıttyq», - deıdi Maqsutqan Dáleıuly. Ol, «bul arqyly halyqtyń yntymaǵyn, aıdyń kúnniń amanynda kisi qolynan qaza tapqandar qaıǵysyna el bolyp ortaqtasa alatynymyzdy kórsettik» deı kele, «Oqıǵa oryn alǵaly beri qaraı «Qamshy» portaly úzdiksiz aqparattyq dabyl kóterip keldi. Sondaı-aq istiń basy qasynda, quqyqtyq jumystarda, izdeý jumysynda Erkin Beısekeı, Dáýletjan, Shalqar syndy azamattardyń da eńbegin aıta ketken jón. Árıne biraýyzdylyq tanytyp, júkti jumyla kótergen elge eń úlken alǵysty aıtamyz», - dedi «Qamshy» tilshisine.
Sondaı-aq, Maqsutqan Dáleıulynyń aıtýynsha, Almas Ahmetbek sıaqty el tanyǵan azamattar bas bolyp, «Úsh arys úshin» atty top arqyly 4 mıllıon 800 myńnyń ústinde qarajat jınalǵan. Bul qarajat qaıtys bolǵandardyń jesirlerine arnaýly eseptik kartochka arqyly aı saıyn 60 myń teńgeden aılyq járdem retinde berile bastaǵan.
Sonymen qatar, «Asqar Jakýlın» qory marqumdardyń otbasyna 1 jarym mıllıon qarajat kómek qolyn sozǵan.
Qosa keter bolsaq,
Eske salsaq, Doldanuly Jarqynbek (1979 jyly týǵan), Zarlyhanuly Muqıat (1973 jyly týǵan), Álimhan Qadylbek Shyǵys Qazaqstan oblysynyń Tarbaǵataı aýdanynan satyp alǵan 40 bas maldy eki júk kóligimen 17 qyrkúıek kúni Uzynaǵash bazaryna shyǵarǵan. Sodan iz-túzsiz joǵalyp ketken. Birneshe kúnnen keıin olardyń denesi tabyldy. 24 qyrkúıekte Almaty oblystyq İshki ister departamentiniń baspasóz qyzmeti iz-túzsiz joǵalǵan úsh aǵaıyndynyń ólimine qatysty kúdiktiler ustalǵanyn habarlady. Olardy qylmyskerler azaptap óltirgen.
Oqıǵa bolǵan kezinde ákimdik marqumdardyń týystaryna kómek kórsetedi degen aqparat taraǵan bolatyn. Alaıda, bul aqparatty «Uzynaǵashta qaza tapqan úsh jigittiń otbasyna materıaldyq kómek kórsetiledi degen aqparat shyndyqqa janaspaıdy», degen málimdemesimen Almaty oblysy ákiminiń orynbasary Bahtıar Ónerbaev joqqa shyǵarǵan edi.
Aıta ketsek, marqumdardyń týystary qylmyskerlerge ólim jazasyn suraǵan bolatyn.
Alaıda sot negizgi aıyptalýshy Talǵat Súleımanovqa sot ómir boıy bas bostandyǵynan aıyrý jazasyn kesti. Al, T. Súleımanovtyń sybaılasy Murat Ońalbaev 25 jylǵa bas bostandyǵynan aıyrylyp, qatań túzimdegi kolonıaǵa jiberiletin bolǵan edi.
Erlan Tóleýbaı
