QR Parlamenti Májilisiniń tóraǵasy Nurlan Nyǵmatýlın jumys saparymen Almaty oblysyna keldi. Maqsaty Elbasynyń jańa Joldaýyn nasıhattaý, óńir tynys-tirshiligimen tanysý, - dep habarlaıdy óńirdegi tilshimiz.
Nurlan Nyǵmatýlın Almaty oblysyna is sapary İle aýdanynan bastady. "Aiuminium of Kazakhstan" seriktestigine qarasty "Hoffmann" zaýytynda bolyp, eńbek ujymymen kezdesti. Olarǵa Prezıdenttiń eldi eleńdetken sońǵy 2 úndeýiniń mán-mańyzyn túsindirip, Joldaý júktegen mindetterge tereń sholý jasady.
Odan keıin, Jetisý óńirindegi eń iri sharýashylyqtardyń biri "Hılnıchenko ı K"-nyń jumysymen tanysty. 4 aýyldyń turǵyndaryn turaqty jumyspen qamtyp otyrǵan qojalyq 39 myń gektar jerge ıelik etedi. Byltyr sonyń 320 gektaryna qant qylshasy egilgen bolatyn. Odan gektaryna 716 sentnerden tátti túbir jınaldy. Seriktestiktiń jyl saıyn tehnıkalary da jańaryp, materıaldyq bazasy jaqsaryp keledi. Al byltyr sharýashylyqtyń taýar aınalymy 1 mlrd teńgeden asqan. Bul qojalyq tarıhyndaǵy eń joǵarǵy kórsetkish. Osy oraıda sharýashylyq basshysy jan-jaqty qoldaýy úshin úkimet pen oblys ákimshiligine alǵysyn bildirdi.
Almaty oblysyndaǵy iri sharýashylyq jumysymen tanysyp bolǵannan keıin, Nurlan Zaırollauly elimiz boıynsha eń alǵashqylardyń biri bolyp elektrondy júıege kóshken Eskeldi aýdanynyń ortalyq aýrýhanasyn aralap shyqty. Aýrýhanada 2008 jyldan bastap tolyqtaı elektrondy medısınalyq qujattaýǵa kóshken. Qazir emdelýge kelgen ár adam tólqujatyn kórsetse boldy, kompúterde naýqastyń emdelý tarıhy birden shyǵady. Aýdan halqynyń ıgiligi úshin jasalyp jatqan jańashyldyqtar rızashylyǵyn bildirgen Májilis tóraǵasy Joldaýda osy densaýlyq saqtaý salasyna zor kóńil bólingendigin aıtyp, «Densaýlyq saqtaý salasyna memleket tarapynan qoldaý kóp. Bolashaqta bólinetin qarajat kólemi artatyn bolady. Eń bastysy qarjyny durys ıgerip, turǵyndarǵa barynsha jaqsy, sapaly medısınalyq qyzmet kórsetilýi kerek» dedi.
Sondaı-aq, Nurlan Nyǵmatýlın Eskeldi aýdanynyń jurtshylyǵymen kezdesip, Elbasynyń Joldaýda júktegen mindetterdi oryndaýda jetisýlyqtardyń qosary kóp ekendigin aıtty. «Ósip-órkendep kele jatqan oblys ortalyǵyn, aýdandarda atqarylyp jatqan isti kórip qýanyp qaldym. Sizderdiń oblys búginniń ózinde ekonomıkanyń naqty baǵyttary boıynsha óte joǵarǵy kórsetkishterge jetip otyr. Oblys ákiminiń eńbegin Úkimettiń keńeıtilgen otyrysynda Elbasynyń ózi atap ótken bolatyn» dep atap ótti.
Jıyn barysynda, Májilis tóraǵasy halyqtyń suraqtaryna jaýap berip, usynys-tilekterin tyńdady. Almaty oblysynda atqarylyp jatqan ıgi isterge joǵary baǵa berip, óńir turǵyndaryn Elbasy joldaýyn qoldap, Úndeýge ún qosýǵa shaqyrdy.
