Halyqaralyq quqyq qorǵaý "Húman Raıts Ýoch" (HRW) uıymy Túrkimenstanda ótetin prezıdent saılaýy qarsańynda málimdeme jasap, erkin jáne taza saılaý ótetinine kúmán keltirgen. Bul týraly Ortalyq Azıa jańalyqtar qyzmeti habarlap otyr.

Uıym taratqan málimdemede sóz bostandyǵy jáne aqparatqa qol jetimdilik joq elde, azamattardyń saılaýda erkin tańdaý jasaýyna múmkindik berilmeıtindigi aıtylǵan.

"Túrkimenstanda eshqashan taza jáne ádiletti saılaý bolǵan emes. Mundaı pikirdi Túrkimenstandaǵy adam quqyqtary jaǵdaıyn uzaq ýaqyttan beri baqylap kele jatqandyqtan aıtyp otyrmyz. Adam quqyǵy óreskel buzylǵan elde sóz bostandyǵy, ashyq baspasóz, erkin jınalý degen múldem bolmaıdy", - dep atap ótedi HRW uıymynyń Eýropa jáne Ortalyq Azıa jónindegi jetekshisi Hú Ýıllámson.

Ýıllámson Túrkimenstan bıligi halyqaralyq úkimettik emes uıymdardy, solardyń ishinde "Húman Raıts Ýochty" eline jibermeıtinin aıtady.

"Túrkimenstannyń halyqaralyq áriptesteri úkimetke adam quqyqtarynyń qorǵalýy úshin, reforma jasalý úshin qysym jasaý kerek", - dep atap ótedi Hú Ýıllámson.

Túrkimenstannyń qazirgi prezıdenti 59 jastaǵy Gýrbangýly Berdymýhamedov elin 2007 jyldan beri basqaryp keledi. Ol prezıdent saılaýyna úshinshi jyl qatarynan túsip otyr. 2016 jyldyń qyrkúıeginde Túrkimenstan jańa Konstıtýsıa qabyldady. Oǵan sáıkes, prezıdent jeti jylǵa saılanady.