Al EXPO-2017 kórmesiniń baspasóz qyzmetindegiler boksshylar arasyndaǵy kelissózderdi rastap bergen bolatyn.

ESPN telearnasynyń Latyn Amerıka redaksıasynyń tilshisi Fernando Barboza qazaqstandyq Gennadıı Golovkın men ulybrıtanıalyq Bıllı Djo Sonderstiń jekpe-jegi qashan ótetinin aıtty, - dep habarlaıdy Vesti.kz. 

"GGG - Sonders jekpe-jegi 10 maýsymda Qazaqstanda ótedi dep josparlanyp otyr. Sebebi 18 naýryzda GGG Djeıkobspen kezdesedi, biraq bul málimetti eshkim resmı túrde jarıalaǵysy kelmeı otyr", - dep jazdy Barboza Twitter jelisindegi akkaýntynda.

Al osyǵan deıin BAQ-tar Golovkın men Sonderstiń Qazaqstanda jazda kezdesýge keliskeni jaıly habarlaǵan. Jekpe-jek EXPO-2017 kúnderi ótedi delinip, al kórmeniń baspasóz qyzmetindegiler boksshylar arasyndaǵy kelissózderdi rastap bergen bolatyn.

Aıta keteıik, 2016 jyly Golovkın Sonderspen kelissóz júrgizgen, alaıda kelisimge kelý múmkin bolmady. Qazaqstandyq ulybrıtanıalyqpen WBO belbeýin tartyp alý úshin kezdeskisi keledi. Al tartyp alǵan jaǵdaıda orta salmaqtaǵy barlyq belbeýdiń basyn biriktiredi.