QR Parlamenti Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine dene shynyqtyrý jáne sport máseleleri boıynsha ózgerister men tolyqtyrýlar engizý týraly» Zań jobasy qaraldy. Otyrysta dopıng máselesin kótergen depýtat Azat Perýashev tyıym salynǵan dárini qoldanǵandar syıaqysyn qaıtaryp berýi tıis ekenin aıtty, dep habarlaıdy Baq.kz tilshisi Bek Tóleýov.
Atalǵan zań jobasy týraly QR Mádenıet jáne sport mınıstri Arystanbek Muhamedıuly baıandama jasady.
Jalpy, bul zań jobasy Parlament Májilisiniń jumys tobynyń 4 otyrysynda talqylandy. Onda depýtattar 56 túzetý engizdi. Sonyń ishinde 41 túzetý boıynsha Úkimettiń oń qorytyndysy alynypty.
Májilis depýtaty Azat Perýashev jalpy otyrysta dopıng máselesin kóterdi. «Aqjol» partıasynyń tóraǵasy sportshylardan dopıng tabylyp jatsa, syıaqysyn memleketke qaıtaryp berýi tıis dep otyr.
«Olımpıadaǵa qatysatyn sportshylar bala emes. Elimizdiń namysyn qorǵap júrgen myqtylar ǵoı. Degenmen óz isine jaýap berýi kerek. Sol úshin Olımpıada aldynda sportshylarmen kelisimshartqa otyrýymyz qajet. Iaǵnı, keıin qanynan dopıng tabylyp jatsa, medalin ǵana emes, memleket bergen syıaqyny da qaıtaryp berýi tıis», – deıdi A.Perýashev.
Eger, dopıngpen ustalǵan sportshy zań júzinde jazalanatyn bolsa, jattyqtyrýshysy da syıaqysynan aıyrylýy múmkin.
«Qazirgi kezde biz halyqaralyq tájirıbeni zerttep jatyrmyz. Sebebi bul másele pysyqtaýdy qajet etedi. Jaýapkershilik deńgeıi boıynsha dopıng salasyna qatysty ózgeristerdi Parlamentke engizbekpiz. Taıaýda Avstrıada bizdiń bıatlonshylarǵa qatysty oqıǵa oryn alǵan bolatyn. Onda tek dárigerdiń tehnıkalyq kinási bar. Dárigerge qatysty qandaı shara qoldana alamyz? Ol tek keshirim surady da, qyzmetinen ketetindigi týraly ótinim jazdy. Al osy jaǵdaıda yqpal etý sharalary joq. Biz zań normasyn jazǵannan keıin, árbiriniń jaýapkershiligi artady. Osy oraıda, ákimshilikten bastap, qylmystyq jaýapkershilikke deıin barlyq normalardy qamtımyz»,– dedi A.Muhamedıuly.
Májilis depýtattary atalǵan zań jobasyn birinshi oqylymda maquldady.
